Bandamenn deila um hvað eigi að gerast næst

Í frétt Reuters, þar sem rætt er við embættismenn víða í Vesturlöndum, segir að útlit sé fyrir að deilur muni koma upp og versna þegar á líður og stríðið og refsiaðgerðir gegn Rússlandi fara að hafa frekari slæm áhrif á hagkerfi heimsins. Samhliða því sé líklegt að pólitískur vilji við að standa við bakið á Úkraínu fari dvínandi á Vesturlöndum.

Sérfræðingar og ráðamenn Vesturlanda hafa sagt að það sé eitthvað sem Pútín ætli að reiða sig á.

Vilja fleiri og betri vopn

Úkraínumenn hafa á undanförnum vikum kallað eftir sendingum þungavopna til Úkraínu og segjast nauðsynlega þurfa betra stórskotalið. Þar séu yfirburðir Rússa miklir og þeir hafi notað þá yfirburði til að sækja fram í Donbas.

Í stuttu máli sagt, þá saka Rússar Vesturlönd um að draga átökin í Úkraínu á langinn með því að veita Úkraínumönnum vopn og gera þeim kleift að verja sig. Fyrir innrásina, sem Rússar kalla sértæka hernaðaraðgerð, kröfðust Rússar þess að Úkraína tæki upp hlutleysi, herinn yrði leystur upp og að Úkraínumenn viðurkenndu innlimun Krímskaga og samþykktu stofnun sjálfstæðra ríkja í Donetsk og Luhansk, sem yrðu svo innlimuð í rússneska sambandsríkið.

Eftir að innrásin hófst bendir lítið til annars en Rússar hafi ætlað sér landvinninga í Úkraínu og nýleg ummæli Vladimírs Pútín, forseta Rússlands, þar sem hann líkti sér við rússneska keisarann Pétur Mikla, styðja það.

Macron, Scholz og Draghi á leið til Kænugarðs

Leiðtogar Frakklands, Þýskalands og Ítalíu, eru sagðir á leið til Kænugarðs í vikunni og er það í fyrsta sinn síðan innrásin hófst. Leiðtogar Frakklands og Þýskalands hafa verið harðlega gagnrýndir vegna ummæla þeirra og aðgerða í kjölfar innrásarinnar.

Emmanuel Macron, forseti Frakklands, hefur verið gagnrýndur fyrir að ræða ítrekað við Pútín og segja að mikilvægt sé að Pútín verði ekki smánaður vegna innrásarinnar, þar sem hersveitir Rússa standa frammi fyrir margvíslegum trúverðugum ásökunum um stríðsglæpi.

Olaf Scholz, kanslari Þýskalands, hefur verið gagnrýndur fyrir að heita Úkraínumönnum hinum og þessum vopnum og hergögnum en ekki standa við stóru orðin. Sömuleiðis fyrir það hvað Þjóðverjar eru háðir orku frá Rússlandi.

Mario Draghi, forsætisráðherra Ítalíu, hefur staðið þétt við bakið á Úkraínumönnum og hefur jafnvel stutt það að Úkraína gangi fljótt til liðs við Evrópusambandið.

Einn bandamaður Macrons sagði Reuters að munurinn á Joe Biden, forseta Bandaríkjanna, og Boris Johnson, forsætirsáðherra Bretlands, annars vegar og Frakka hins vegar snerist um það hvort snúa ætti aftur til kalda stríðsins eða ekki.

Hann sagði að á einhverjum tímapunkti myndu Vesturlönd þurfa að eiga viðræður við Pútín aftur og það sé í raun nauðsynlegt til að tryggja að stríðið verði eins stutt og mögulegt sé.

Þýskur heimildarmaður fréttaveitunnar sagði Þjóðverja óttast að Vesturlönd væru að ýta undir það að Úkraínumenn settu sér óraunhæf markmið. Eins og það að ná mögulega aftur tökum á Krímskaga, sem Rússar hertóku árið 2014. Slík markmið gætu dregið stríðið á langinn.

Þurfa að taka afstöðu

New York Times segir að þessir leiðtogar og aðrir, þurfi fljótt að gera ljóst hvaða afstöðu þeir hafi til þess að senda frekari vopn til Úkraínu eða kalla frekar eftir friðarviðræðum við Rússa til að reyna að binda enda á stríðið.

Úkraínumenn og aðrir bandamenn þeirra í Austur-Evrópu og þá sérstaklega í Póllandi og Eystrasaltsríkjunum, hafa þó ítrekað að það yrðu mistök. Það að gera Rússum kleift að halda landsvæðum í Úkraínu myndi gefa Rússum tíma til að byggja herafla sinn upp að nýju og gera aðra árás á Úkraínu eða jafnvel önnur ríki Austur-Evrópu á komandi árum.