Vildi koma ferlinum af stað á Ís­landi | Húkkaði far á tón­listar­há­tið á Ísa­firði

Svona er sumarið er hlaðvarp sem fer yfir hvert tímabil fyrir sig í efstu deild karla í fótbolta frá árinu 1992. Þáttur númer 21 datt inn á helstu hlaðvarpsveitur í vikunni en þar var farið yfir sumarið 2012.

Þar kom Alexander Scholz við sögu en ólíkt því sem var talið fyrir þá leitaðist Scholz sjálfur eftir því að koma til Íslands að spila. Það átti heldur betur eftir að reynast gæfuspor fyrir hann og hans feril.

Eftir að spila 17 leiki fyrir Vejle í Danmörku og verið hluti af U-19 ára landsliði Danmerkur ákvað Scholz að taka sér pásu frá fótbolta og skoða heiminn. Var hann staddur í Indlandi þegar hann samdi við Stjörnuna fyrir tímabilið 2012. 

Á þessum tíma var Stjarnan með danskan markvarðaþjálfara, Henrik Bödker. Sá aðstoðaði einnig danska leikmenn við að finna lið á Íslandi. Voru til að mynda þrír Danir í liði Stjörnunnar þetta sumar.

Eftir að Scholz kom hingað til lands og ferill hans fór á flug var talið að Bödker hefði unnið þrekvirki með því að fá þennan magnaða miðvörð hingað til lands en í Svona var sumarið kom annað í ljós, Scholz hafði nefnilega sjálfur samband við Bödker.

„Frumkvæðið var mitt, ég spurði Henrik hvort hann gæti aðstoðað mig að finna lið á Íslandi. Hann sagði mér að bíða aðeins, fékk meðmæli og endaði á að segja mér að hans lið – Stjarnan – vildi fá mig,“ segir Scholz í viðtali við Jóhann Skúla Jónsson, þáttastjórnanda Svona var sumarið.

„Ég var alltaf metnaðarfullur en á þessum tíma var ég ekki nægilega einbeittur og vildi byrja upp á nýtt. Ég vildi einnig prófa að búa erlendis. Held að það hafi verið mitt fyrsta markmið, að fara erlendis og upplifa eitthvað annað heldur en Danmörku.“

„Metnaðurinn jókst síðan eftir því sem leið á sumarið og þó ég hafi aðeins spilað á Íslandi í eitt ár þá skrifaði ég upprunalega undir tveggja ára samning. Markmiðið mitt var að spila um sumarið en ferðast um veturinn. Ég var meira að segja með það í samningnum mínum að ég þyrfti ekki að vera á Íslandi í 5-6 mánuði yfir vetrartímann. Auðvitað myndu launin mín lækka en ég myndi samt fá nóg til að geta ferðast. Í dag finnst mér þetta hafa verið aðeins of mikið,“ segir Scholz um upphaf veru sinnar í Garðabænum.

Húkkaði far á Aldrei fór ég suður

„Já, það var danskur strákur að spila þar – Dennis Nielsen – ég hitti hann á hótelinu þegar ég kom fyrst til Íslands. Við spjölluðum og hann bauð mér þangað, ég hugsaði „af hverju ekki“ og það passaði vel við týpuna sem ég var þá að ég hafi ákveðið að húkka far alla leiðina þangað.“

„Þetta er einn af hlutunum sem sleppur þegar maður er 18-19 en ég myndi aldrei gera þetta í dag,“ sagði Scholz aðspurður hvort hann hefði húkkað sér far á tónlistarhátíðina Aldrei fór ég suður sem haldin er á Ísafirði.

Í viðtalinu fer Scholz einnig yfir að hann hafi átt erfitt uppdráttar í upphafi ferils síns hér á landi. Hann hafi spilað æfingaleik á miðjunni og staðið sig skelfilega. Það rættist þó ágætlega úr veru hans hér á landi, Stjarnan endaði í 5. sæti en þó aðeins tveimur stigum á eftir Breiðabliki sem endaði í 2. sæti.

Þá komst liðið alla leið í bikarúrslit þar sem það beið lægri hlut geng KR. Alls spilaði Scholz 26 leiki hér á landi og skoraði í þeim sjö mörk.

Það er svo það sem hann hefur áorkað síðan hann gekk í raðir belgíska liðsins Lokeren eftir tímabilið 2012 sem vekur athygli. Hann hefur spilað í þremur löndum síðan og unnið titla í þeim öllum. 

1. Bikarmeistari - Lokeren, 2014
2. Bikarmeistari - Standard Liége, 2016
3. Belgíumeistari - Club Brugge, 2018
4. Belgíski Ofurbikarinn - Club Brugge, 2018
5. Bikarmeistari – Midtjylland 2019
6. Danmerkurmeistari – Midtjylland, 2020
7. Keisarabikarinn – Urawa Red Diamonds, 2021
8. Japanski Ofurbikarinn – Urawa Red Diamonds 2022

Þá lék hann á sínum tíma 14 leiki fyrir U-21 árs landslið Danmerkur, þar á meðal einn gegn Íslandi.

Scholz er aðeins 29 ára gamall í dag og því nægur tími til að bæta titlum við í safnið og mögulega næla í fyrsta A-landsleikinn. Hér að neðan má hlusta á viðtalið sem Jóhann Skúli tók við Alexander Scholz. Það hefst eftir 31 mínútu.