Ever Forward siglir loks á ný

Samvinna, dráttarbátar, prammar og háflóð komu við sögu, segir í frétt AP fréttaveitunnar um málið: „Með ótrúlegri samvinnu og smá flóði siglir skipið loks á ný,“ sagði hafnarstjórinn William P. Doyle á samfélagsmiðlinum Linkedin.

Skipið er systurskip Ever Given sem stöðvaði umferð um Súesskurð í heila viku á síðasta ári og olli þar með gríðarlegri truflun á vöruflutningum í heiminum.

Ever Forward er 305 metra langt og um borð eru nærri fimm þúsund gámar. Björgunarsveitir fjarlægðu um 500 gáma til að létta skipið og þeir voru fluttir yfir á pramma.

Nú stendur til að sigla skipinu til hafnar og kanna ástand skrokksins. Að því loknu verða gámarnir fluttir yfir á skipið að nýju og það siglir loks sína leið.