Ó­víst hvort Rússar virði vopna­hlé á allri út­göngu­leiðinni

Samið var um vopnahlé á leiðinni frá Maríupol og Volnovakha til Zaporizhzhia í norðri. Leiðin liggur um borgirnar Nikolske, Rozivka, Polohy, og Orikhiv. Leiðin er um 227 kílómetrar frá Maríupol og ætti undir venjulegum kringumstæðum að taka um þrjár klukkustundir á bíl. Ljóst er að leiðin verður seinfarnari en venjulega þegar hundruðir þúsunda flóttamanna fara hana á sama tíma.

Borgarráð Maríupol segir Rússa ekki virða umsamið vopnahlé eftir allri leiðinni sem stendur. „Við eigum í viðræðum við Rússa til að staðfesta að vopnahlé verði virt að fullu,“ segir í tilkynningu borgarráðsins.

Unnið er að þvi að koma um tvö hundruð þúsund manns frá hafnarborginni Maríupol í dag og um fimmtán þúsund frá Volnovakha.

Anton Herashchenko, aðstoðarinnaríkisráðherra Úkraínu, segir að samið verði um tímabundið vopnahlé á fleiri stöðum til að gera almennum borgurum kleift að flýja.

„Það verða klárlega gerðir fleiri samningar á borð við þessa fyrir öll önnur svæði,“ hefur Reuters eftir honum.