Á leið frá ÍBV til Ís­lendinga­liðs Kristian­stad

Pridham samdi við ÍBV fyrir tímabilið og hefur leikið frábærlega með liðinu í Pepsi Max deildinni í sumar. Hún er meðal markahæstu leikmanna deildarinnar eftir að hafa skorað sjö mörk í 10 leikjum. Þá skoraði hún eitt mark í tveimur bikarleikjum.

Samkvæmt öruggum heimildum mbl.is hefur Delaney Pridham leikið sinn síðasta leik fyrir ÍBV og mun ganga í raðir Kristianstad á næstu dögum. Knattspyrnusamband Íslands hefur staðfest vistaskipti til Svíþjóðar á vefsíðu sinni og því styttist eflaust í að hún verði tilkynnt sem leikmaður Kristianstad.

Félagaskiptaglugginn er lokaður svo liðið getur ekki fyllt skarðið sem Pridham skilur eftir sig með erlendum leikmanni. ÍBV þarf því að treysta á aðra leikmenn það sem eftir lifir tímabils.

Kristianstad er mikið Íslendingalið en Sif Atladóttir og Sveindís Jane Jónsdóttir leika með liðinu og Elísabet Gunnarsdóttir er þjálfari þess. Þá eru þrír aðrir Íslendingar í þjálfarateymi liðsins.

Kristianstad er sem stendur í 4. sæti sænsku úrvalsdeildarinnar með 20 stig að loknum 12 leikjum. ÍBV situr á sama tíma í 6. sæti Pepsi Max deildar kvenna í knattspyrnu með 16 stig að loknum 13 leikjum. 

Sænska úrvalsdeildin er á Stöð 2 Sport en upplýsingar um útsendingar má finna hér. Sænski boltinn er hluti af Stöð 2 Sport Erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.