Níu greindust innan­lands

Níu greindust með kórónuveiruna innan­lands í gær. Sex af þeim sem greindust í gær voru í sóttkví, eða 67 prósent. Þrír þeirra sem greindust í gær voru utan sóttkvíar, eða 33 prósent.

Þetta kemur fram í uppfærðum tölum á vefnum covid.is. Alls eru 59 nú á sjúkrahúsi vegna Covid-19, þar af þrír á gjörgæslu. Í gær voru 62 á sjúkrahúsi og þrír á gjörgæslu.

Níu smit greindust á landamærum – þrjú virk smit, niðurstöðu mótefnamælingar er beðið í tilvikum fjögurra og þá voru tveir með mótefni.

340 manns eru nú í einangrun, samanborið við 351 í gær. Þá eru 693 í sóttkví í dag, samanborið við 719 í gær.

Af þeim níu sem greindust innanlands í gær greindust sex eftir að tekin voru svokölluð einkennasýni, en þrír eftir svokallaða sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 66,8 en var 71,4 í gær. Þá er nýgengi landamærasmita nú 8,5, en var 9,3 í gær.

Nú hafa 5.180 manns greinst smitaðir af kórónuveiru frá upphafi faraldursins. Á síðunni segir ennfremur að af þeim veikst hafa af Covid-19 eru 25 nú látnir.

Alls voru tekin 335 einkennasýni hjá sýkla- og veirufræðideild Landspítalans og Íslenskri erfðagreiningu í gær og 274 sýni á landamærunum eða í seinni landamæraskimun. Þá voru 47 sýni tekin við sóttkvíar- og handahófsskimun.

Fréttin hefur verið uppfærð.