Krefst 3,5 milljóna króna eftir hættulega árás með óvenjulegum vopnum

Tæplega þrítugur karlmaður hefur verið ákærður fyrir sérstaklega hættulega líkamsárás með því að hafa aðfaranótt miðvikudagsins 11. október árið 2017 veist að fertugum karlmanni fyrir utan veitingastaðinn Moe's Bar grill í Seljahverfinu í Breiðholti í Reykjavík.

Er árásarmaðurinn meinti sakaður um að hafa kastað poka með óopnuðum bjórdósum í hinn karlmanninn en pokinn lenti á vinstri öxl og hálsi hans. Í kjölfarið á hann að hafa slegið fórnarlambið í höfuðið með járnröri og eftir það slegið og kastað múrsteini í höfuð hans.

Afleiðingarnar voru þær að fórnarlambið hlaut x-laga opinn skurð í hársverði við efsta hluta ennisbeins með hvern arm um sig um sjö sentimetrar. Náði skurðurinn í gegnum höfuðleður og þurfti að sauma hann með fjórtán sporum.

Auk þess hlaut hann kúlu á hægri hluta ennisblaðs sem og utarlega á kinnbeini, innankúpublæðingu og sprungu í ennisbeini hægra megin.

Fórnarlambið krefst 3,5 milljóna króna í miskabætur vegna árásarinnar en málið verður þingfest í héraði á morgun.