Sigríður leiðir hæfnisnefnd um skipun seðlabankastjóra

Sigríður Benediktsdóttir, hagfræðingur við Yale-háskóla, fer fyrir hæfnisnefndinni sem falið er að meta hæfni 16 umsækjenda um embætti seðlabankastjóra. Ráðgert er að endanleg niðurstaða hæfnisnefndar liggi fyrir eigi síðar en 15. júní.

Á vef Stjórnarráðsins er greint frá því að í hæfnisnefndinni séu þrír einstaklingar, tvær konur og einn karl.

Um er að ræða þau Eyjólf Guðmundsson, rektor Háskólans á Akureyri og Þórunni Guðmundsdóttur, hæstarlögmann og varaformann bankaráðs, auk fyrrnefndrar Sigríðar. Eyjólfur er tilnefndur til nefndarsetunnar af samstarfsnefnd háskólastigsins, Þórunn af bankaráði Seðlabankans en Sigríður er skipuð án tilnefningar.

Sigríður hefur meðal annars setið í bankaráði Landsbankans og stýrði fjármálastöðugleikasviði Seðlabankans frá 2011 til 2016. Sigríður var auk þess í rannsóknarnefnd Alþingis um bankahrunið árið 2008 og þá átti hún sæti í kerfisáhætturáði Danmerkur á árunum 2013 til 2016. 

Sem fyrr segir sóttu 16 einstaklingar um embætti seðlabankastjóra. Þau eru:

Arnór Sighvatsson, ráðgjafi seðlabankastjóra

Ásgeir Jónsson, dósent og forseti hagfræðideildar Háskóla Íslands

Ásgeir Brynjar Torfason, lektor við Háskóla Íslands

Benedikt Jóhannesson, fyrrverandi fjármála- og efnahagsráðherra

Gunnar Haraldsson, hagfræðingur

Gylfi Arnbjörnsson, hagfræðingur

Gylfi Magnússon, dósent

Hannes Jóhannsson, hagfræðingur

Jón Daníelsson, prófessor

Jón G. Jónsson, forstjóri bankasýslu ríkisins

Katrín Ólafsdóttir, lektor

Salvör Sigríður Jónsdóttir, nemi

Sigurður Hannesson, framkvæmdastjóri

Sturla Pálsson, framkvæmdastjóri markaðsviðskipta og fjárstýringar í Seðlabanka Íslands

Vilhjálmur Bjarnason, lektor

Þorsteinn Þorgeirsson, sérstakur ráðgjafi á skrifstofu seðlabankastjóra