Á­tökin geri bar­áttuna við verð­bólguna enn erfiðari

Líkt og Vísir hefur fjallað um hafa átökin í Íran og víðar í Mið-Austurlöndum valdið hærra olíuverði á heimsmarkaði.

Reuters segir hækkunina mega einna helst rekja til óvissu með siglingar um Hormússund, sem er inngangurinn að Persaflóasvæðinu og lykilflutningaleið fyrir olíu og jarðgas, en 20 prósent af olíu og gasi heimsins fer þar um. Þegar hafa verið gerðar árásir á nokkur skip sem hafa siglt um svæðið.

Enn meira krefjandi og aðkallandi

Berghildur Erla Bernharðsdóttir fréttamaður ræddi þessi tíðindi við Daða Má Kristófersson, fjármála- og efnahagsráðherra, að loknum ríkisstjórnarfundi í morgun. Hann segir þau neikvæð í ljósi áframhaldandi baráttu við verðbólgu.

„Þetta er að vísu verðbólga sem er af öðrum toga og ekki hluti af því þensluvandamáli sem við höfum verið að eiga við. En þetta gerir verkefnið enn þá meira krefjandi og aðkallandi.“

Ástandið hafi verið rætt á ríkisstjórnarfundinum, meðal annars þýðing þess fyrir efnahagsmálin hér á landi. Verið sé að undirbúa greiningu á áhrifum í fjármálaráðuneytingu, sem verði lögð fyrir ríkisstjórn.

„Þetta eru auðvitað atburðir sem eru að þróast á meðan við erum að tala. Þannig að það er svolítið erfitt að átta sig á því nákvæmlega hvernig þetta mun fara. En þetta er bolti sem við höfum næmt auga á.“

Í góðu samtali við vinnumarkaðinn

Að loknum síðasta fundi ríkisstjórnarinnar á föstudag boðaði Daði Már aðgerðir á allra næstu dögum í baráttunni gegn verðbólgunni.

Ríkisstjórn Kristrúnar Frostadóttur tók við fyrir fjórtán mánuðum, í desember 2024, en síðan hafa vextir lækkað hægar en vonast var til og tólf mánaða verðbólga hefur heilt yfir aukist. Hún stendur í stað á milli mánaða samkvæmt nýjustu mælingu og mælist rúmlega fimm prósent.

Þú boðaðir fyrir helgi að þið ætlið að bregðast við með aðgerðum vegna verðbólgu. Er búið að ákveða eitthvað?

„Við erum núna í mjög gagnlegu samtali við aðila vinnumarkaðarins um hvað við munum gera og hvenær.“

Hvenær má búast við að það fréttist eitthvað um frekari aðgerðir?

„Á allra næstu dögum, en þetta er flókið verkefni, krefst samhæfingar og það er það sem við erum að vinna í.“

Þess má geta að forveri Daða Más í starfi fjármálaráðherra til margra ára, Bjarni Benediktsson, mætti til starfa sem framkvæmdastjóri Samtaka atvinnulífsins í gær. Því má ætla að hann sé meðal þeirra sem Daði Már á í góðu samtali við.