Dæmdur fyrir vændisummæli og myndbirtingar af fyrrverandi

Karlmaður hlaut sex mánaða dóm í Héraðsdómi Reykjavíkur í morgun fyrir stafrænt kynferðisofbeldi gagnvart fyrrverandi kærustu sinni. Maðurinn fullyrti bæði á Facebook og á spjallborðum að kærastan fyrrverandi stundaði vændi. Þá birti hann myndir af henni fáklæddri á umræddum síðum.

Ákæra héraðssaksóknara á hendur manninum var í þremur liðum. Hann játaði sök í einum liðum, þar sem hann skrifaði ummæli og birti myndir undir eigin nafni á Facebook, en neitaði sök í þeim þar sem ummæli voru sett fram undir fölsku nafni.

Fjórir mánuðir af sex mánaða dómnum eru skilorðsbundnir. Var maðurinn dæmdur til að greiða konunni 1,6 milljónir króna í skaðabætur.

„Litil kinky og ráðvilt hóra“

Fjallað var um ákæruna á Vísi þegar málið var þingfest hjá dómstólnum í desember. Var málið gegn karlmanninum höfðað fyrir brot gegn blygðunarsemi og stórfelldar ærumeiðingar gegn kærustunni fyrrverandi árið 2016.

Var karlmaðurinn í ákærunni sagður hafa sært blygðunarsemi konunnar, móðgað hana og smánað.

Um var að ræða þrjú tilfelli en í öllum tilfellum var um að ræða brot á Internetinu þar sem karlmaðurinn birti myndir og ummæli af konunni. Maðurinn nafngreindi konuna í sumum tilfellum. 

Að neðan má sjá ákæruliðina þrjá:

1. Með því að hafa skrifað eftirfarandi ummæli við mynd af konunni sem birt var í Facebook-hópi: „Hvað er þessi frammhjáhalds vændiskona að gera á fundi []. Feminissti sem rukkar menn fyrir mjög lélegt kynlíf og kugar svo þessa menn.“

2. Með því að hafa í september það ár sett andlitsmynd af konunni inn á vefsíðu þar sem nektarmyndum er deilt án leyfis og skrifað eftirfarandi texta: „Litil kinky og ráðvilt hóra. Eiga margir myndir? Fann sima með þessum myndum. Hún seldi sig fyrir 10 þus.“

3. Með því að hafa sett þrjár myndir af konunni inn á sömu síðu sem karlmaðurinn tók af henni þegar þau voru í sambandi og sýndu konuna fáklædda og skrifaði eftirfarandi texta undir tvær myndanna

„Eg stal handa okkur myndum af þessari [] melluni sem er í [] or som. Hun er vist svaka dráttur. Deepthrot og allur pakkin. Hard anal og allt. Rukkar yfir leit bara 20 fyrir allt. Hun var að með gaur sem eg þeki og seldi sig regluleva og sagði svo að srr hafi verið nauðgað ... bellað lið þarna handan gangana :D““

Sakfellt í fimmta skipti

Krafist var 2,5 milljóna króna í miskabætur fyrir konuna en dómurinn dæmdi henni 1,6 milljónir króna.

Dómar fyrir stafrænt kynferðisofbeldi eru svo til nýir af nálinni. Málþing fór fram um stafrænt kynferðisofbledi hjá Háskólanum í Reykjavík í gær þar sem fram kom í máli Kolbrúnar Benediktsdóttur varahéraðssaksóknara að fyrst hafi verið ákært í slíku máli árið 2016.

Þremur árum síðar hafa verið gefnar út níu ákærur í málaflokknum. Um er að ræða fimmta málið þar sem sakfellt er. Þremur málum er ólokið en auk þess hefur fimm sinnum verið fallið frá saksókn í málum. Í fjögur af þeim skiptum var það gert í kjölfar sáttamiðlunar.

„Upplýsingar um og rannsóknir á umfangi brotanna á öðrum vettvangi sýnir að mjög lítill hluti málanna kemur til kasta lögreglu og ákæruvalds,“ sagði Kolbrún í erindi sínu á málþinginu í gær.