Vildu helst Asíu­búa í flug til Græn­lands

Framan af var þetta einkum flug fyrir dönsk stjórnvöld og bandaríska herinn en einnig fyrir vísindaleiðangra. Opnun flugvallarins í Kulusuk, sem bandaríski herinn hóf að leggja árið 1956, varð hins vegar grunnurinn að flugi Íslendinga með ferðamenn sem og áætlunarflugi til Grænlands. Flugfélagsmenn riðu á vaðið.

„Þeir byrja með túristaflug til Grænlands árið 1958 og það vex og vex. Fyrst til Kulusuk og svo seinna til Narsarsuaq,“ segir flugsögusérfræðingurinn Pétur P. Johnson í Grænlandsþætti Flugþjóðarinnar á Sýn+

Flugáhafnir Flugfélagsins kynntust framandi menningu. Póstflugi var jafnframt sinnt á afskekkta staði þar sem pökkum var kastað út um opnar dyr á flugvélinni. Áhafnarmeðlimir þurftu að passa sig að detta ekki sjálfir út.

Fleiri flugrekendur áttu eftir að bætast í Grænlandsflugið, eins og Helgi Jónsson, sem þekktastur var fyrir flugskólann. Árið 1984 hóf hann áætlunarflug til Kulusuk og var um tíma með þrjár nítján sæta Jetstream-skrúfuþotur í nafni Odin Air.

Norðlendingar hafa verið öflugir í Grænlandsflugi undanfarna hálfa öld út frá Akureyri. Sigurður Aðalsteinsson, einn af stofnendum Flugfélags Norðurlands, rifjar upp hvernig það kom til. 

Norlandair tók síðar við keflinu. Friðrik Adolfsson, fyrrverandi framkvæmdastjóri og aðaleigandi Norlandair, lýsir miklum umsvifum Norðlendinga í flugi til Grænlands.

Burðarþol flugvélanna var oft það takmarkað að sjaldnast var hægt að nýta öll sætin í Grænlandsfluginu. Ráðamenn Íslandsflugs fundu ráð við því þegar þeir hófu flug til Kulusuk á nítján sæta Dornier, eins og Ómar Benediktsson, annar stofnanda Íslandsflugs, lýsir í þessum kafla þáttarins:

Þátturinn um Grænlandsflugið er sá sautjándi í þáttaröðinni. Áskrifendur geta séð hann í heild sem og alla þætti Flugþjóðarinnar á streymisveitunni Sýn+.