Klæðning Laugalækjarskóla veldur áhyggjum vegna brunans í Grenfell-turninum

Forstjóri Mannvirkjastofnunar hefur miklar áhyggjur af því að brennanlegt efni hafi verið notað í klæðningu Laugalækjarskóla. Sérstaklega út af brunanum í Grenfell turninum í Bretlandi í fyrra þar sem 72 létu lífið. Lögreglan hefur þrjá grunaða um að hafa borið eld að Laugalækjarskóla aðfaranótt þriðjudags. Sáust þeir í upptökum eftirlitsmyndavéla en grunur er um að þarna hafi verið ungmenni að ferð.

Varðstjóri hjá slökkviliði höfuðborgarsvæðisins ræddi við Vísi að slökkvistarfi loknu í gær en hann sagði að erfiðlega hefði gengið að komast að eldinum sem var í klæðningu hússins. Sagði varðstjórinn að eldurinn virtist loga í timbri sem var þar undir.

Vill nánari útskýringu frá byggingarfulltrúa

Bjarni Kjartansson, sviðsstjóri forvarnasviðs slökkviliðs höfuðborgarsvæðisins, sagði í fréttum Stöðvar 2 í gær að krossviðarrenningar og pappi hefðu verið notaðir til að klæða húsið og það efni hefði brunnið vel.

Bjarni segir í samtali við Vísi í dag að það sé skýrt kveðið á um það í aðaluppdrætti hússins að nota átti tregbrennanlegt efni í klæðningu hússins. Það var hins vegar augljóslega ekki gert og verður haft samband við byggingarfulltrúa Reykjavíkurborgar til að fá nánari útskýringar á því hvernig þetta gat gerst.

Spurður hvort gerð verði krafa um að klæðningin verði öll fjarlægð segir Bjarni það koma til skoðunar. 

Forstjóri hefur áhyggjur vegna Grenfell-brunans

Björn Karlsson, forstjóri Mannvirkjastofnunar, segist ætla að ræða við byggingarfulltrúa Reykjavíkurborgar og eldvarnaeftirlit slökkviliðsins til að komast að því hvar mistökin liggja.

„Hjá Mannvirkjastofnun lítum við klæðningar á húsum mjög alvarlegum augum og ekki síst eftir þennan hræðilega atburð sem varð í Bretlandi, brunann í Grenfell Tower, þar sem menn voru mjög greinilega að nota ólöglegt brennanlegt efni, en einhvern veginn misstu þeir af því í eftirlitinu,“ segir Björn.

Setja einangrun á byggð hús í nafni orkunýtingar

Hann segir það færast sífellt í aukana að eigendur húsa vilji setja einangrunarefni utan á þau til að auka orkunýtingu.

„Þarna viljum við hjá mannvirkjastofnun að menn fari mjög varlega og menn skoði mjög gaumgæfilega hvort efni séu brennanleg eða ekki. Við munum fylgjast með þessu ásamt byggingarfulltrúa og eldvarnaeftirliti því þetta er mjög mikilvægt málefni og full ástæða til út af þessum atburðum í Bretlandi.“

Jóhann Karl Þórisson, yfirlögregluþjónn á höfuðborgarsvæðinu, segir í samtali við Vísi að lögreglan hafi þrjá undir grun vegna íkveikjunnar. Þeir sáust bera elda að Laugalækjarskóla en spurður um aldur þeirra segir Jóhann að grunur sé um að þeir séu undir átján ára aldri, án þess að geta staðfest það.