Engar bætur fyrir evrópsk félög vegna HM 2022

Alþjóðaknattspyrnusambandið, FIFA, hefur staðfest að evrópsk knattspyrnufélög munu ekki fá sérstakar bætur vegna HM 2022 í Katar.

Í gær var greint frá því að skipulagsnefnd mótsins hafi lagt til að mótið fari fram í nóvember og desember það ár og er búist við því að framkvæmdastjórn FIFA staðfesti það á fundi sínum í næsta mánuði.

Afleiðingarnar eru miklar fyrir evrópsk knattspyrnufélög sem þurfa að gera langt hlé á keppnistímabili sínu vegna mótsins sem leiðir til þess að keppnistímabilið byrjar bæði fyrr og lýkur síðar en venjan er.

Sjá einnig: Styttra HM 2022 í nóvember og desember

Engu að síður mun FIFA ekki greiða þeim liðum sem verða fyrir áhrifum af HM að vetri til sérstakar bætur vegna þessa. Ekki er útilokað að félögin eða deildirnar sjálfar muni leita réttar síns vegna þessa og fara með FIFA fyrir dómstóla.

„Það er ekki hægt að ætlast til þess að evrópsk félög og deildir eigi að bera kostnaðinn af breyttu keppnisdagatali vegna HM. Við eigum von á því að félögin fái bætur vegna þessa,“ sagði Karl-Heinz Rummenigge, stjórnarformaður samtaka evrópskra knattspyrnufélaga.

Jerome Valcke, ritari FIFA, segir hins vegar að engar bætur verði greiddar. „Það er samkomulag við félögin í gildi. Þau fá sjö ár til að endurskipuleggja sig.“

Í gær var einnig gefið í skyn að úrslitaleikur mótsins kynni að fara fram 23. desember. Líklegt er að það verði raunin og enn fremur að mótið muni hefjast 26. nóvember.