„Bara lét okkur heyra það í hálf­leik“

„Mér fannst við ekki nógu góðir í fyrri hálfleik. Ég var ekki alveg búinn að sjá hvort að boltinn var inni þarna eða hvort hann hafi farið í höndina á einhverjum,“ sagði Ísak og vitnaði þá í færi íslenska liðsins í fyrri hálfleik þar sem boltinn virtist hafa farið yfir marklínuna.

„Fyrri hálfleikurinn var bara alls ekki nógu góður og við vorum bara ekki on it. Í svona leikjum, þar sem er svona lítil prósenta á milli liðanna og við erum ekki alveg on it, þá er það bara erfitt. Sama hvert maður fer í alþjóðlegum fótbolta þá er það bara erfitt. Við tökum þessu stigi, en við erum ekki ánægðir með heildarframmistöðuna.“

Þá sagði Ísak það vera erfitt að greina það svona strax eftir leik hvað liðið hefði getað gert betur til að ná að brjóta Eistana á bak aftur.

„Það er erfitt að greina það núna. Arnar fór yfir nokkra hluti í hálfleik, bara lét okkur heyra það í hálfleik. Við breyttum aðeins pressunni og mér fannst seinni hálfleikurinn vera miklu betri, pressulega séð og með boltann. Það kom þarna kafli á 60.-80. mínútu þar sem við vorum að þrýsta þeim niður og mér fannst markið alveg hafa getað komið þá. En þetta var bara erfitt,“ sagði Ísak og hélt áfram.

„En við erum á toppnum í þessum riðli. Þetta er erfiður útivöllur og við þurfum bara að einbeita okkur að jákvæðu punktunum og læra af þessu og greina í nóvemberglugganum.“

Eftir þennan fjögurra leikja landsleikjaglugga trónir Ísland á toppi 4. riðils C-deildar Þjóðadeildarinnar með tveggja stiga forskot, sem er eitthvað sem Ísak hefði þegið fyrirfram.

„Já, algjörlega. Markmiðið var að vera á toppnum farandi inn í nóvemberverkefnið. Þá er það Búlgaría úti og Lúxemborg heima. Við erum með þetta í okkar höndum og núna þurfum við að greina þetta verkefni og koma sterkari í nóvembergluggann.“

Að lokum segist Ísak hafa komist vel undan þessum langa landsleikjaglugga þar sem reyndi á marga leikmenn í fjórum leikjum á stuttum tíma.

„Ég er sjálfur bara góður. Ég er 23 ára og get alveg hlaupið 90 mínútna leiki á þriggja daga fresti. Maður þarf bara að hugsa vel um sig á milli leikja og fara í meðhöndlun og allt þetta. En skrokkurinn er bara góður,“ sagði Ísak að lokum.