Næst ekki í Kane og tví­sýnt hvort hann komi

Kane hefur leikið með Grindavíkurliðinu síðan árið 2023 og varð Íslandsmeistari með liðinu í vor. Þegar hann fór heim til Pittsburgh í Bandaríkjunum í vor var hann hins vegar tekinn fastur vegna skuldar í meðlagsgreiðslur sem námu rúmlega 12 milljónum króna.

Honum var svo sleppt og greindu Grindvíkingar frá því við Vísi í sumar að búist væri við honum aftur hingað til lands í haust.

Nú eru aftur á móti tveir dagar í fyrsta leik, og raunar fór fyrsti leikur Grindavíkur fram síðustu helgi í Meistarakeppni KKÍ, og enn bólar ekkert á kraftframherjanum.

Jóhann Þór Ólafsson, þjálfari Grindavíkur, segir Grindvíkinga ekki hafa náð símasambandi við Kane síðustu daga, en það sé þó ekkert nýtt.

„Það er í raun ekkert nýtt að maður nái ekki í hann, það hefur verið vandamál síðan hann kom hérna fyrst fyrir fjórum árum síðan. Það er bara business as usual,“ segir Jóhann í samtali við Vísi.

En í ljósi málsins sem kom upp í vor, er þá ekkert stress að hann sé ekki að koma til landsins líkt og til stóð?

„Jú, það er það. Og verður tvísýnna með hverjum deginum sem líður. Við höfum ekki náð í hann í einhverja fjóra daga núna og erum svona farnir að huga að því hvernig við bregðumst við ef hann kemur ekki. Þetta er persónulegt mál sem hefur tekið á hann og það er óljóst hvað verður. Við gefum þessu út daginn og sjáum svo til,“

„Það er fyrsti leikur á föstudaginn svo það þarf að fara að huga að þessu. Það er enn á plani að hann komi og við erum ekki farnir beint í það að skoða aðra kosti. Við gefum þessu aðeins meiri tíma og þá förum við að skoða okkar mál,“ segir Jóhann.

Grindavík var án lykilmanna í stórtapi fyrir KR í Meistarakeppninni. Ólafur Ólafsson og Daniel Mortensen voru frá og þá var Jeremy Pargo nýlentur frá Bandaríkjunum og spilaði leikinn ekki.

Jóhann hefur þó ekki of miklar áhyggjur af stöðunni.

„Óli (Ólafur Ólafsson, fyrirliði Grindavíkur) verður frá í einhvern tíma og vonandi að hann geti spilað eitthvað fyrir áramót. Það er styttra í Daniel (Mortensen), vonandi einhverjar tvær vikur. Það er ekkert stórmál, við höfum séð það svartara.“