Þriðja metið hjá Anítu í Mannheim?

 Sex íslensk ungmenni keppa á Junioren Gala-mótinu í Mannheim um helgina sem er eitt stærsta ungmennamót heims á hverju ári. Mótið að þessu sinni er stór þáttur í undirbúningi krakkanna fyrir HM U20 sem fram fer í Eugene í Oregonríki í Bandaríkjunum síðar í þessum mánuði.

Þau sem fengu boð eru Vigdís Jónsdóttir, Íslandsmethafi í sleggjukasti, Hilmar Örn Jónsson sleggjukastari, spretthlaupararnir Jóhann Björn Sigurbjörnsson og Kolbeinn Höður Gunnarsson, spjótkastarinn Sindri Hrafn Guðmundsson og gullstúlkan Aníta Hinriksdóttir sem keppir í 800 metra hlaupi.

Vigdís og Hilmar Örn eru líkleg til að setja met á mótinu sem og Aníta sem elskar að hlaupa í Mannheim.

Hún sló tæplega 29 ára gamalt Íslandsmet Ragnheiðar Ólafsdóttur á þessu móti fyrir tveimur árum þegar hún hljóp á 2:04,90 mínútum og bætti það svo í fimmta sinn í Mannheim í fyrra þegar hún hljóp á 2:00,49 mínútum. Það er Íslandsmet hennar í dag.

Sleggjukastararnir Vigdís Jónsdóttir og Hilmar Örn Jónsson hafa verið í miklu stuði það sem af er ári. Hilmar setti nýtt Íslandsmet með 6 kg sleggju á móti í Hafnarfirði í maí þegar hann kastaði 75,27 metra. Fyrra metið átti hann sjálfur.

Vigdís bætti átta mánaða gamalt met Söndru Pétursdóttur í apríl og bætti svo eigið met í Hafnarfirði mánuði síðar þegar hún kastaði sleggjunni 55,41 metra.

Þau tvö keppa á laugardaginn líkt og spretthlaupararnir Jóhann og Kolbeinn Höður. Aníta keppir í 400 metra hlaupi á laugardaginn og 800 metra hlaupi á sunnudaginn.