„Þessi Kane er stór­hættu­legur“

Það dylst engum að DaAndre Kane er frábær leikmaður sem kemur með ótrúlega mikla reynslu og hæfileika inn í lið Grindavíkur en hann hefur átt það til að missa hausinn þegar hlutirnir eru kannski ekki alveg að falla með honum.

En í leiknum gegn ríkjandi Íslandsmeisturum Stjörnunnar, þar sem að Grindavík tryggði sér deildarmeistaratitilinn með sigri, sýndi hann sínar bestu hliðar. Kane skoraði 26 stig í leiknum, tók átta fráköst og gaf þrjár stoðsendingar. Var potturinn og pannan í leik Grindavíkur og sýndi hvers hann er megnugur. 

„Mér fannst hann vera einhvern veginn ekki í þessu tuði, sveiflandi höndum eða hengja haus,“ sagði Hermann Hauksson í Körfuboltakvöldi. „Mér fannst hann meira hvetjandi. Þegar að hann var að skora körfur sá maður það á svipnum hjá honum að það væri mikil einbeiting til staðar. Þegar að Grindavík vantaði körfu þá fór það í gegnum hann. Annað hvort var hann að setja niður körfur eða búa þær til.“

Alvöru vopn fyrir Grindavík.

„Þessi Kane er stórhættulegur. Þetta er sá Kane sem Grindavík þarf til þess að taka næsta skref.“

Umræðuna um DeAndre Kane í Körfuboltakvöldi í heild sinni má sjá hér fyrir ofan.