Höfðu sætaskipti og Farah tók gullið

Englendingurinn Mo Farah kom, sá og sigraði í 10 þúsund metra hlaupi á heimsmeistaramótinu í frjálsum íþróttum í Moskvu í dag.

Ólympíumeistarinn frá því í London tók forystuna síðustu hringina en Ibrahim Jeilan frá Eþíópíu veitti honum harða keppni allt til loka.

Farah kom í mark á tímanum 27:21,21 mínútum en Jeilan var sekúndu á eftir á 27:22,23 mínútum. Paul Taniu frá Kenía varð þriðji.

Farah og Jeilan öttu einnig kappi í hlaupinu fyrir tveimur árum. Þá hafði Jeilan betur en í dag höfðu þeir félagar sætaskipti.