Sören Colding hættur hjá AG

Sören Colding, framkvæmdastjóri danska handknattleiksfélagsins AG Kaupmannahafnar, hefur sagt upp störfum. Ekstraxbladed greinir frá þessu.

Töluverð óvissa hefur verið innan danska félagsins eftir brotthvarf aðaleiganda og stjórnarformanns Jesper Nielsen á dögunum. Nú hefur Colding, hans hægri hönd, einnig horfið á braut.

Leikmenn danska liðsins eiga líkt og flestir launþegar von á launagreiðslum á morgun. Ekstrabladed telur mikla óvissu ríkja um hvort hægt verði að greiða leikmönnum laun enda sé danska félagið á kúpunni.

Danska blaðið segir köldu hafa andað á milli Colding og nokkurra leikmanna danska félagsins undanfarið sem krafið hafa Colding um svör um stöðu félagsins.