Lést í fjöldaárekstri á Nürburgring-brautinni

Finninn varð 66 ára.

Atvikið átti sér stað í undankeppni ADAC 24 tíma kappakstursins á Nürburgring, viðburði sem hafði vakið aukna athygli á heimsvísu vegna þátttöku formúlukappans Max Verstappen í henni.

„Allir sem koma að 24 tíma kappakstrinum senda aðstandendum Juha Miettinen samúðarkveðjur,“ skrifar keppnisstjórnin á miðla keppninnar.

Nürburgring er ein af krefjandi og þekktustu kappakstursbrautum heims. Hún hefur því fengið gælunafnið „Græna vítið“.

Í dag varð hörmulegt slys á þýsku brautinni í tímatökum fyrir 24 tíma kappaksturinn á Nürburgring. Alls lentu sjö bílar í árekstrinum og Finninn Juha Miettinen, sem ók með sænskt keppnisleyfi, lést.

„Þrátt fyrir að björgunarsveitir hafi verið fljótar á staðinn gátu bráðalæknar ekki bjargað lífi Juha Miettinen,“ skrifar keppnisstjórnin í yfirlýsingu.

Hinir sex ökumennirnir sem lentu í banaslysinu hafa verið skoðaðir af heilbrigðisstarfsfólki og meiðsli þeirra eru ekki lífshættuleg.

Keppninni var aflýst og á morgun verður mínútuþögn haldin við uppstillingu á ráslínu.

Formúlu 1-stjarnan Max Verstappen tekur þátt í keppninni en kom ekki nálægt slysinu.

Þetta var fyrsta banaslysið í keppni á Nürburgring síðan 2013.