Handbolti

„Unirbúningur, hjartað og bar­áttan“

Hjörtur Leó Guðjónsson skrifar
Jón Bjarni Ólafsson skoraði fimm mörk fyrir FH í kvöld.
Jón Bjarni Ólafsson skoraði fimm mörk fyrir FH í kvöld. Vísir/Anton Brink

„Þetta var bara ótrúlega skemmtilegur leikur,“ sagði línumaðurinn Jón Bjarni Ólafsson, leikmaður FH, eftir sigur liðsins gegn Haukum í undanúrslitaeinvígi Olís-deildar karla í handbolta í kvöld.

„Þetta voru bara tvö virkilega góð lið að mætast, en við vorum aðeins betri í kvöld,“ bætti Jón við.

Eins og í fyrri tveimur leikjum þessara liða í undanúrslitaeinvíginu þá var nánast jafnt á öllum tölum lengst af. FH-ingar sigldu þó fram úr í lokin og unnu fjögurra marka sigur, 27-23.

„Lokatölurnar segja alls ekki rétta sögu. Þetta eru allt búnir að vera jafnir leikir, en við reynum bara að undirbúa okkur þannig að þetta sveiflist í okkar átt.“

Þá vildi Jón sérstaklega hrósa varnarleik FH-inga í kvöld, og því sem honum fylgir.

„Bara hrós á varnarlínuna og markmennina. Þeir eru búnir að vera ekkert eðlilega góðir. Ég held að þetta sé allt saman bara undirbúningur, hjartað og baráttan. Og vilji.“

„Ég vil líka bara hrósa ungu strákunum, sem eru búnir að vera ótrúlega góðir. Við erum ótrúlega heppnir hérna í FH að eiga svona mikið af góðum leikmönnum sem eru að stíga upp.“

Að lokum lá ekkert á svörum þegar Jón var spurður að því hvort FH-ingar ætluðu sér ekki að klára einvígið á útivelli á föstudaginn, þrátt fyrir að liðið vilji auðvitað spila sem flesta heimaleiki.

„Jú, hundrað prósent,“ sagði Jón einfaldlega að lokum.




Fleiri fréttir

Sjá meira


×