Bilun í sjálfvirkum símsvara

Bilun í gagnagrunni Þjónustuvers Símans gerði það að verkum að frá því á föstudag áttu viðskiptavinir í miklum erfiðleikum með að ná í þjónustunúmerið 800 7000 og lá símsvörun niðri um tíma á föstudagskvöldið. Aðfaranótt laugardags var gert við til bráðabirgða þannig að hægt væri að sinna lágmarksþjónustu. Hægt er að hringja í þjónustunúmerið, en ekki velja sig sjálfvirkt áfram. Eva Magnúsdóttir, upplýsingafulltrúi Símans, segir að kallaður hafi verið út aukamannskapur til að sinna svörun, en gat ekki sagt til um hvenær búist væri við að viðgerð lyki. Hún benti á að einnig mætti senda fyrirspurnir á tölvupóstfangið 8007000@siminn.is.