Sagðir vilja fá Or­bán til að stýra Sam­einuðu þjóðunum

Ritstjórn Wall Street Journal, eins af flaggskipunum í fjölmiðlaveldi Ruperts Murdoch, sagði frá áhuga ríkisstjórnar Donalds Trump á að fá Orbán til þess að stýra Sameinuðu þjóðunum í leiðara sem birtist í gær.

Vísaði hún til heimildarmanna frá þremur löndum sem segðu að Trump-stjórnin hefði talað fyrir því að Orbán tæki við þegar Antonio Guterres, fráfarandi framkvæmdastjóri, hættir um áramótin. Fulltrúar Kína og Rússlands hefðu tekið jákvætt í það.

Orbán var helsti bandamaður Trump-stjórnarinnar og Vladímírs Pútín Rússlandsforseta í Evrópu þar til hann galt afhroð í þingkosningum fyrr á þessu ári. Innan Evrópusambandsins stóð hann í vegi refsiaðgerða gegn Rússum vegna innrásar þeirra í Úkraínu og gegn frekari stuðningi við Úkraínumenn.

Trump lýsti yfir stuðningi við Orbán fyrir þingkosningarnar og J.D. Vance, varaforseti Bandaríkjanna, ferðaðist til Ungverjalands til þess að taka þátt í kosningabaráttu ungverska bandamanns þeirra.

Hlálegt

Donald Tusk, forsætisráðherra Póllands, gaf lítið fyrir söguna um Orbán þegar hún var borin undir hann í dag.

„Fyrir ekki svo löngu átti hann að verða forseti framkvæmdastjórnar Evrópusambandsins. Þetta virkar á mig jafn hlálegt og fyrri kjaftasagan,“ sagði Tusk, að sögn evrópska blaðsins Politico.

Sjö tilnefningar til framkvæmdastjóra Sameinuðu þjóðanna hafa þegar borist. Á meðal þeirra sem hafa verið tilnefndir er Rafael Grosso, argentínskur fyrrverandi framkvæmdastjóri Alþjóðakjarnorkustofnunarinnar, og Olara Otunnu, fyrrverandi utanríkisráðherra Úganda.