Enn lítið um svör í Eng­landi

Donald Trump, forseti Bandaríkjanna, og Marco Rubio, utanríkisráðherra, hafa lýst yfir furðu sinni á því að mönnunum hafi verið sleppt úr haldi gegn tryggingu.

Fimm ungir menn, allir breskir ríkisborgarar, voru handteknir í Whelford aðfaranótt sunnudagsins. Þá hafði bóndi á ferðinni nærri Fairford-flugstöðinni séð mennina á þremur sendiferðabílum og segir hún að þeir hafi verið grímuklæddir og reynt að fela sig fyrir henni.

Hún hringdi á lögregluna og mennirnir voru handteknir vegna gruns um að þeir hefðu brotið gegn lögum um meðferð sprengiefna. Í kjölfarið var svo bætt við að þeir væru grunaðir um skipulagningu hryðjuverka.

Eins og áður segir var neyðarástandi lýst yfir og var lögreglan með gífurlegan viðbúnað á svæðinu. Öryggisráðstafanir í herstöðinni voru auknar til muna og embættismenn hafa talað um að komið hafi verið í veg fyrir hörmulega atburði.

Sjá einnig: Kallaði ráð­herra á fund vegna hand­töku mannanna við her­stöðina

Einnig hafa breskir embættismenn talað um að erlent ríki hafi komið að málinu með einhverjum hætti, sem Rubio tók einnig undir í gærkvöldi.

Í viðtali á Fox sagðist hann ekki geta tjáð sig almennilega um málið en gaf til kynna að atvikið hefði getað verið gífurlega alvarlegt.

„Ég átta mig ekki á því af hverju Bretar slepptu þessum fimm mönnum,“ sagði Rubio.

Flestum íbúum Whelford var gert að yfirgefa heimili sín og sýndi myndefni úr þyrlum og drónum að sprengjusérfræðingar voru að nota róbóta til að skoða sendiferðabílana þrjá.

Búið var að merkja bílana tilteknu fyrirtæki, en nafnið var rangt og rangur litur á merki fyrirtækisins. Þetta fyrirtæki flytur eldsneyti á bóndabæi í Bretlandi og hefur verið talað um að tunnur hafi fundist í bílnum.

Líklega engar sprengjur í bílnum

Í gær var mönnunum fimm svo sleppt óvænt úr haldi lögreglu, sem vakti strax mikla furðu, og hafa litlar upplýsingar verið veittar um málið síðan. Það sem hefur verið sagt er að yfirvöld séu að skoða aðkomu annarra ríkja að málinu og það hvort að mennirnir hafi mögulega unnið ómeðvitað fyrir annað ríki.

Spjótin hafa beinst að Íran, þar sem umrædd herstöð hefur verið notuð af Bandaríkjamönnum. Langdrægum sprengjuflugvélum hefur verið flogið þaðan til árása í Íran.

Útlit er fyrir að engar sprengjur hafi fundist í sendiferðabílunum þremur og var íbúum Whelford í gær leyft að fara aftur heim til sín.

Sjá einnig: Hryðjuverkamönnunum grunuðu sleppt úr haldi

Heimildarmenn Guardian segja það að mönnunum hafi verið sleppt benda til þess að talið sé að þeir hafi ekki haft í hyggju að fremja einhvers konar árás.

Í frétt Sky News segir þó að öryggisgæsla sé enn mikil á svæðinu. Lögregluþjónar séu að stöðva bíla og ræða við fólk í þeim og vísa á brott þeim sem eiga ekki heima í þorpinu. Þá eru lögregluþjónar enn að störfum á vettvangi þar sem sendiferðabílarnir voru.

Enn liggur ekkert fyrir um hvað mönnunum gekk til, eins og hvað þeir voru að gera og hvort þeir voru að gera það fyrir einhvern. Þá er ekki einu sinni vitað hvort þeir hafi verið að brjóta eitthvað af sér.