Spurðu hvað fyrir­tæki ætluðu að gera og hafa þegar fengið svar

Í tilkynningu á vef VR segir að þegar kjarasamningar voru undirritaðir hafi launafólk tekið mikla áhættu með því að fallast á lágar launahækkanir á verðbólgutímum. 

Á móti hafi fyrirtæki ætlað að halda aftur af verðhækkunum til að ná niður verðbólgu og vöxtum. Verð hafi þrátt fyrir þetta hækkað látlaust og vextir séu svimandi háir. Forsendur kjarasamninga séu brostnar og þeir gætu losnað 8. október næstkomandi.

Óbreytt ástand sé ekki í boði

VR, LÍV og Fagfélögin hafa því sent verðmótandi fyrirtækjum bréf og óskað svara um hvað þau ætli að leggja af mörkum svo að kjarasamningar geti haldið gildi sínu. „Óbreytt ástand er ekki valkostur.“ 

Hér fyrir neðan er listi yfir þau fyrirtæki sem fengu bréfið sent:

• Arion banki
• Bera
• Drangar
• Eimskipafélag Íslands
• Festi
• Garri
• Hagar
• HS Orka
• Innnes
• Íslandsbanki
• ÍSAM / Ó. Johnson & Kaaber
• Kaupfélag Skagfirðinga
• Kvika banki
• Landsbankinn
• Landsvirkjun
• Natan
• Orkuveitan
• RARIK
• Samskip
• Sláturfélag Suðurlands
• Veitur

SS tekur á sig hundrað milljóna kostnað

Fréttastofu barst í morgun fréttatilkynning frá Sláturfélagi Suðurlands í tilefni af þessari áskorun stéttarfélaganna.

„Óstöðugleiki, sem leiðir til verðbólgu og hárra vaxta, er eitt helsta meinið í efnahagsmálum íslendinga. Síðustu kjarasamningar voru til langs tíma sem er mikilvægt upp á stöðugleika. Í þeim var uppsagnarákvæði í október 2026 ef verðbólga væri yfir umsömdum mörkum. Því miður hefur verðbólga verið yfir þessum mörkum undanfarið og spilar þar meðal annars inn í hækkanir vegna stríðsátaka á mörgum vörum sem fluttar eru til landsins. Eftir sem áður er mjög mikilvægt að samningsaðilar leiti leiða til að kjarasamningum verði ekki sagt upp.“

Í bréfi stéttarfélaganna, sem hafi borist fyrir nokkrum dögum, hafi þess verið óskað að félagið, sem stór aðili á markaði, legði sitt af mörkum til þess að ekki kæmi til uppsagnar kjarasamninga með því að draga til baka og/eða endurskoða fyrirhugaðar verðhækkanir sem SS hafði kynnt til að mæta miklum kostnaðarhækkunum á árinu.

Frá áramótum hafi plastumbúðir hækkað um 16 til 30 prósent, flutningskostnaður aukist um 15 prósent, önnur rekstrarvara hækkað um 5 til 15 prósent og laun hækkað um 5,3 prósent. Áætluð hækkun til bænda sé 3 til 4 prósent.

„Til að mæta hluta þessa kostnaðarauka ætlaði SS að hækka verð um 3 til 5 prósent á næstu dögum. SS hefur fjallað um þessa beiðni og telur rétt, sem ábyrgur aðili, að taka tillit til þessara óska vegna þess sem er í húfi. Verðhækkun allra vara í smásölu undir vörumerkjum SS, 1944 og Búrfell sem áttu að hækka um 3 prósent hefur verið frestað fram í janúar. Nokkrir vöruliðir í smásölu sem áttu að hækka um 5 prósent munu hækka um 3 prósent. Kostnaður SS við að fresta eða breyta nefndum verðbreytingum er áætlaður 90 til 110 milljónir króna. Með þessum framlagi vill félagið leggja lóð á vogarskál stöðugleika og vonar að kjarasamningar haldi.“