Tveir á slysa­deild eftir eld í Jörfa­bakka

Íbúarnir höfðu orðið fyrir reykeitrun eftir að þeir reyndu að slökkva eldinn áður en slökkviliðið kom á vettvang. Varðstjóri hjá slökkviliði höfuðborgarsvæðisins segir að vel hafi gengið að slökkva þegar liðið mætti enda eldurinn ekki mikill. Töluverður reykur kom þó frá eldinum sem barst inn á stigagang hússins. 

Íbúar í Jörfabakka voru beðnir um að halda sig innandyra á meðan á aðgerðum stóð og ekki kom til þess að rýma þyrfti húsið. 

Varðstjórinn hafði ekki upplýsingar um líðan fólksins sem flutt var á slysadeild. 

Eldsupptök eru ókunn en brunnar rafhlöður fundust í ruslageymslunni og því er ekki talið útilokað að eldurinn hafi kviknað út frá þeim.