Keyrðu utan í bílinn í eftir­förinni

„Ég var bara heima þegar ég heyri í svakalegum fjölda af sírenum og skil ekkert hvað er í gangi og flýtti mér út í glugga,“ segir Glódís Gabríella Halldórsdóttir íbúi í Vogahverfi í Reykjavík í samtali við Vísi. Hún náði myndbandi af eftirförinni en þar má sjá fjögur lögregluhjól og einn lögreglubíl á eftir ökumanninum.

Ótrúlegur hávaði

„Maður hugsar bara hvað í ósköpunum er í gangi þegar maður sér svona, hér í hverfinu fylgdist fullt af fólki með þessu eðlilega,“ segir Glódís. Hún segir mikinn hávaða hafa verið í hverfinu. Myndbandið sem hún náði hefur vakið mikla athygli á samfélagsmiðlum.

Ökumaðurinn ók bílnum sínum síðar inn á malarplan í Stefnisvogi. Þar tókst lögreglunni að stöðva för hans eftir að hafa keyrt utan í vinstri hlið á bílnum hans. Lögregla hefur ekki veitt Vísi frekari upplýsingar um málið.