Þögul sem gröfin um meintan trúnaðarbrest

Silja Rún Sigurbjörnsdóttir og Oddur Ævar Gunnarsson skrifa 13. apríl 2026 18:58

Inga Sæland, formaður Flokks fólksins, segist vera döpur. Vísir/Lýður Valberg

Inga Sæland, formaður Flokks fólksins, segist ekki vita hvaða persónulegu trúnaðarbrestir urðu til þess að Guðmundur Ingi Kristinsson, þingmaður flokksins og fyrrverandi ráðherra hans, sagði sig úr flokknum.

Guðmundur Ingi Kristinsson sagði sig úr bæði Flokki fólksins og þingflokknum fyrr í dag en auk þess að vera þingmaður var hann einnig varaformaður flokksins. Í svörum sínum vísar hann til persónulegs trúnaðarbrests sem varðar persónuleg samskipti innan flokksins, sem ástæðu afsagnarinnar.

Guðmundur Ingi tók við sem mennta- og barnamálaráðherra þegar Ásthildur Lóa Þórsdóttir lét af embættinu í mars 2025. Í byrjun desember 2025 fór Guðmundur Ingi í veikindaleyfi og gekkst undir hjartaaðgerð. Eyjólfur Ármannsson, innviðaráðherra, fór síðan í fæðingarorlof svo um tíma var Inga þrefaldur ráðherra.

Eftir aðgerðina sagðist Guðmundur Ingi hlakka til að mæta aftur til starfa en nokkrum dögum síðar sagði hann af sér sem ráðherra. Inga kom í hans stað og tók Ragnar Þór Ingólfsson við embætti félags- og húsnæðismálaráðherra.

Í kvöldfréttum Sýnar segist Inga hafa átt farsælt samstarf með Guðmundi Inga og viti ekki hvaða trúnaðarbrest hann vísi í.

„Það verður að spyrja Guðmund Inga sérstaklega. Við höfum átt farsælt samstarf og ég hef ekki orðið vör við persónulegan trúnaðarbrest á milli mín og Guðmundar Inga,“ segir Inga.

„Ég mun sakna Gumma, eins og ég hef alltaf kallað hann, og óska honum alls hins besta. Ég veit að það er enginn málefnalegur ágreiningur eða neitt slíkt, Guðmundur Ingi hefur af huga og hjarta barist með mér í gegnum þykkt og þunnt, við höfum auðvitað verið lengst af í stjórnarandstöðu og þar höfum við unnið sem einn maður. Ég á eftir að sakna Gumma en við hittumst hérna í þinginu og hann hefur gefið það út að hann haldi áfram að styðja sína ríkisstjórn.“

Hún segir að þetta sé á við að missa bróður og muni það hafa áhrif á flokkinn.

„En það kemur dagur eftir annan dag svo við höldum áfram að hitta Guðmund hérna í þinginu þrátt fyrir að hann sé ekki lengur í gula,“ segir Inga og vísar þar í fundarherbergi Flokks fólksins sem er kallað gula herbergið.

Þú hefur ekki grun um hvað hann er að vísa í?

„Nei.“

Þú vilt ekkert tjá þig frekar um þetta? Fyrrverandi ráðherra sem segir sig úr flokknum.

„Nei, ég vil ekki gera það. Ég er bara döpur.“

Fréttin hefur verið uppfærð.

Flokkur fólksins Alþingi Ríkisstjórn Kristrúnar Frostadóttur Afsögn Guðmundar Inga Kristinssonar