„Þetta var aldrei eitt­hvað sjálf­gefið“

Valskonur unnu sjö marka sigur gegn Þór/KA í undanúrslitum í kvöld, en lengst af var leikurinn jafn og spennandi.

„Við lentum í veseni með þær í fyrsta leiknum og við vitum að þetta er hörkulið sem getur spilað sjö á sex og er með flnka leikmenn. Við bjuggumst við því, en ég var töluvert ánægðari með seinni hálfleik en fyrri hálfleik.“

Valskonur byrjuðu leikinn af miklum krafti og komust í 3-0 strax í upphafi. Þær áttu þó í miklu basli með að hrista Þór/KA af sér og það tókst ekki fyrr en að um stundarfjórðungur var til leiksloka.

„Eins og ég segi þá er þetta hörkulið sem hefur gert vel í vetur. Þetta hefur verið svona spútniklið deildarinnar, með fína leikmenn og þær hafa verið að stríða liðum og taka stig af góðum liðum og fleira. Þetta var aldrei eitthvað sjálfgefið og þær gáfu okkur klárlega leik í dag.“

Þá segir hann að betri varnarleikur í seinni hálfleik hafi skilað Valsliðinu sigri.

„Mér fannst við bara ná að þétta varnarleikinn og þá kemur markvarsla og fleira með. Mér fannst við skulda sjálfum okkur betri frammistöðu. Við byrjuðum leikinn vel en svo fjaraði aðeins undan. Það voru tæknifeilar og við vorum aðeins að flýta okkur, sem við löguðum aðeins í hálfleik og gerðum betur í seinni.“

Valskonur mæta Haukum í úrlsitum Powerade-bikarsins næstkomandi laugardag.

„Það leggst bara vel í mig. Það hafa alltaf verið hörkuleikir og hafa verið það á þessu tímabili og síðustu ár. Við erum bara spenntar að mæta þeim,“ sagði Anton að lokum.