Þóttist vera borgar­starfs­maður og sveik út síma og verk­færi

Svikin framdi maðurinn með því að látast vera starfsmaður sveitarfélaganna og framvísa fölsuðum innkaupabeiðnum frá þeim tvo daga í ágúst árið 2022.

Á þennan hátt sveik hann sex snjallsíma með söluverðmæti sem nam rúmum 1,2 milljónum króna samtals út úr verslunum. Símarnir voru ranglega skuldfærðir á viðskiptareikning Reykjavíkurborgar en verslanirnar fengu þá aldrei greidda.

Þá blekkti maðurinn starfsmenn verslana til þess að afhenda sér ýmis verkfæri og skópar sem saman voru metin á rúma milljón króna. Verkfærin voru skuldfærð á Reykjavíkurborg en þrjú Scarpa-skópör á Kópavogsbæ.

Maðurinn var einnig ákærður fyrir smáþjófnað, hraðakstur og ölvunar- og vímuefnaakstur.

Sviptur réttindum ævilangt fyrir tæpum áratug

Upphaflega lýsti maðurinn sakleysi sínu af skjalafalsinu og fjársvikunum en játaði umferðarlagabrotin og smáþjófnaðinn. Síðar venti hann kvæði sínu í kross og játaði öll brotin.

Játning var metin honum til málsbóta en á hinn bóginn var litið til þess að hann hefði verið sakfelldur fyrir ítrekuð skjalafalsbrot og ítrekaðan akstur undir áhrifum. Fram kemur í dómnum að hann hafi þrisvar gengist undir lögreglustjórasátt vegna vímuefnaaksturs frá árinu 2015. Þá hafi hann verið sviptur ökuréttindum ævilangt og dæmdur í þrjátíu daga fangelsi vegna þess árið 2016.

Maðurinn var dæmdur í fimm mánaða skilorðsbundið fangelsi og ævilöng svipting ökuréttar hans var áréttuð. Hann þarf einnig að greiða einu fyrirtækjanna sem hann svindlaði á rúmar 323 þúsund krónur auk rúmlega 800 þúsund króna í málskostnað.