Sturla Böðvars­son er látinn

Sturla var Snæfellingur að ætt og uppruna, fæddur í Ólafsvík 23. nóvember 1945 og sleit barnsskónum þar.

Foreldrar hans voru þau Elínborg Ágústsdóttir, húsfreyja frá Mávahlíð, og Böðvar Bjarnason, byggingameistari frá Böðvarsholti. Eftirlifandi systkini Sturlu eru Auður og Snorri. Sturla var húsasmíðameistari að mennt og lauk námi í byggingatæknifræði frá Tækniskóla Íslands.

Sturla fór ungur að vinna við smíðar með föður sínum og spilaði knattspyrnu með Víkingi á æskuárunum. Hann lék á gítar í nokkur ár m.a í danshljómsveitinni Þyrnum.

Hann hafði yndi af hestamennsku, stangveiði, tónlist og lestri fagurbókmennta. Hann hafði áhuga á sögu lands og þjóðar og einkum varðveislu byggingararfsins sem Stykkishólmur ber fagurt vitni um. Hann var vakinn og sofinn yfir samfélagi sínu og sérstaklega fyrir lífgæðum íbúa á landsbyggðinni. Sem ráðherra lagði hann fram fyrstu samgönguáætlunina sem og fjarskipta- og ferðamálaáætlun. Ungur að árum gekk hann til liðs við Sjálfstæðisflokkinn og bar hann sjálfsstæðisstefnuna fyrir brjósti alla tíð og vildi hag flokksins sem mestan. Hann var vinnusamur og agaður í hverju því sem hann tók sér fyrir hendur. Traustur, þrautseigur, prúður en fylginn sér.

Sturla var farsæll stjórnmálamaður og lét um sig muna á þeim vettvangi í fimm áratugi. Hann var 28 ára gamall þegar hann varð sveitarstjóri í Stykkishólmi og gegndi því starfi í 17 ár áður en hann var kjörinn á Alþingi árið 1991. Hann var samgöngu, fjarskipta- og ferðamálaráðherra frá 1999-2007, forseti Alþingis frá 2007-2009 og síðan aftur bæjarstjóri í Stykkishólmi frá 2014-2018.

Sturla kvæntist árið 1967 Hallgerði Gunnarsdóttur lögfræðingi frá Hjarðarfelli í Miklaholtshreppi og eiga þau fimm börn og 12 barnabörn.