Neita að tjá sig um um­mæli Trumps um á­rás í Venesúela

Þá hafa yfirvöld í Venesúela ekkert sagt um einhvers konar árás þar í landi.

„Þeir eru með stóra verksmiðju, eða stóra aðstöðu, þaðan sem skipin koma,“ sagði Trump í viðtali sem birt var í útvarpi vestanhafs á föstudaginn.

„Fyrir tveimur dögum, rústuðum við þeim stað. Svo við veittum þeim þungt högg.“

Erfitt hefur reynst að fá frekari upplýsingar frá embættismönnum vestanhafs en einn sagði í samtali við New York Times að Trump hafi verið að vísa til fíkniefnainnviða en vildi ekki segja meira. Aðrir hafa lítið sem ekkert viljað segja.

Fyrirspurnum fjölmðla vestanhafs til Hvíta hússins, hersins, leyniþjónustunnar og annarra embætta hefur ekki verið svarað.

Ítrekaðar árásir á sjó

Undanfarnar vikur og mánuði hefur ríkisstjórn Trumps sent umtalsverðan herafla til Karíbahafsins og austanverðs Kyrrahafs. Trump hefur kallað eftir því berum orðum að Nicolas Maduro, forseta Venesúela, verði komið frá völdum en hefur ekki viljað segja hvort hann sé tilbúinn til að beita hervaldi til að velta honum úr sessi.

Þá hafa árásir verið gerðar á fjölda báta í Karíba- og Kyrrahafinu sem Bandaríkjamenn halda fram að hafi verið notaðir til að smygla fíkniefnum og nærri því hundrað manns eru taldir hafa fallið í þessum umdeildu árásum. Þær hafa verið kallaðar aftökur án dóms og laga.

Að minnsta kosti 105 hafa fallið í þessum árásum.

Einnig hafa Bandaríkjamenn stöðvað og lagt hald á olíuflutningaskip frá Venesúela.

Hefur bæði talað um leynilegar aðgerðir og loftárásir

Trump hefur opinberað að hann hafi heimilað leyniþjónustum Bandaríkjanna að fara í aðgerðir í Venesúela og gefið til kynna að loftárásir komi til greina. Í samtali við hermenn um borð í flugmóðurskipinu USS Gerald Ford á aðfangadagskvöld, lýsti Trump svæðinu kringum Venesúela sem „áhugaverðu“ og sagði að Bandaríkjamenn myndu brátt „fara á eftir landinu“.

Samkvæmt frétt CNN munu þessar samræður hafa átt sér stað um svipað leyti og hin meinta árás.

Ef marka má Trump, virðist sem að annaðhvort hafi loftárás verið gerð í Venesúela eða að sérsveitarmenn hafi gert þar einhvers konar árás. Hvort sem er, ef það er á annað borð, er það í fyrsta sinn svo vitað sé.