„Þessi hópur getur orðið mjög góður en hann þarf tíma til að læra“

Ísland endaði mótið þar með á góðum nótum eftir svekkjandi töp í síðustu tveimur leikjum. Arnar segir þakklæti vera honum efst í huga eftir HM.

„Ég er þakklátur fyrir að fá að vera hluti af þessum hópi, sem er að þróast og þroskast. Þetta er spennandi ungt lið og maður vissi í raun ekkert hvað myndi gerast. Við lentum á vegg hér og þar en heilt yfir erum við klárlega að þróast í rétta átt og þessi hópur getur orðið mjög góður en hann þarf tíma til að læra.“

„Viljinn til þess að gera vel og læra er mikill… og núna er komið að því að taka eins mikinn lærdóm úr þessu móti og mögulegt er. Við þurfum að vinna góða vinnu næstu vikur og mánuði, greina þetta allt saman og bæta við“ sagði hann einnig.

Nú tekur við tæplega fjögurra mánaða landsleikjafrí þar til hópurinn hittist aftur í undankeppni EM í mars. Arnar ætlar ekki að slaka of mikið á yfir hátíðarnar, heldur verður hann með hugann við hornavarnir.

„Það er fiskurinn næstu vikurnar og svo bara frábært jólafrí. Ég fer heim til Eyja vonandi á mánudaginn og svo fer auðvitað vinna í það núna, að klippa þetta allt aftur og sjá hvað önnur lið eru að gera vel. Hvernig alþjóða boltinn er að þróast hvað varnir í hornum varðar, við þurfum að taka þetta upp og við þurfum að læra þetta. Fullt af svoleiðis hlutum, en jólafrí fyrst! Klárlega“ sagði Arnar og hló aðeins að sjálfum sér fyrir að vera með hugann við handbolta öllum stundum.