Rakel Sara vann tvenn verð­laun á Norður-Evrópumótinu

Rakel Sara, sem kemur úr Gerplu, vann bronsverðlaun í fjölþrautinni og fylgdi því síðan eftir með að vinna silfurverðlaun í gólfæfingum.

Íslenska kvennalandsliðið varð í fimmta sæti í liðakeppninni en liðið varð fyrir áfalli strax í upphitun, í fyrsta sæti þegar Nanna Guðmundsdóttir, reynslubolti liðsins, meiddist á fæti á slánni sem varð til þess að hún keppti ekki með liðinu.

Efst íslensku keppendanna í dag varð eins og áður sagði Rakel Sara sem endaði með 47.250 stig sem tryggði henni þriðja sætið í fjölþrautinni.

Frábær árangur hjá þessari ungu og upprennandi fimleikakonu. Hún gerði sér einnig lítið fyrir og komst inn í úrslit á þremur áhöldum af fjórum. Þóranna Sveinsdóttir, úr Stjörnunni komst einnig í úrslitin á tvíslánni.

Rakel Sara bætti sig heldur betur í úrslitum í gólfæfingum. Hún kom inn áttunda í úrslitin en hækkaði einkunnina sína um 0.700 stig sem telst mikil bæting milli daga. Þessi mikla bæting skilaði henni silfurverðlaunum.

Rakel Sara átti ekki eins góðan dag á slánni í dag og í gær þar sem hún kom fyrst inn í úrslit en endaði í sjöunda sæti þar með tvö föll.

Í stökkinu varð Rakel Sara fjórða eins og í undanúrslitunum. Þóranna hækkaði sig um þrjú sæti á tvíslánni og var hársbreidd frá bronsinu.

Karlamegin var Atli Snær Valgeirsson í úrslitum á þremur áhöldum af sex og hækkaði sig um tvö sæti í stökkinu þar sem hann endaði sjötti. Hann ætlaði sér meira á gólfi en svekkjandi fall setti strik í reikninginn þar og sjöunda sætið var niðurstaðan.

Jón Sigurður Gunnarsson hækkaði sig um þrjú sæti á svifránni og var jafn Atla Snæ í fimmta sæti með 11.650 stig. Í hringjunum ætlaði Jón sér verðlaunasæti en fall í afstökkinu kom í veg fyrir það. Lúkas Ari Ragnarsson kom inn á hringina sem varamaður og endaði sjötti.

Sólon Sverrisson átti úrslitasæti í stökki og á tvíslá en dró sig úr keppni á stökkinu þar sem Sigurður Ari Stefánsson kom í hans stað.