Rétti Trump miða um að til­kynna sam­komu­lag um Gasa

Það þyrfti Trump að gera svo hann gæti verið fyrstur til að tilkynna að samkomulag hafði náðst og það á Truth Social, hans eigin samfélagsmiðli. Á miðanum segir að samkomulag sé „mjög nærri“.

Í kjölfarið svaraði Trump nokkrum spurningum frá blaðamönnum meðan Rubio stóð óþreyjufullur nærri, samkvæmt AP fréttaveitunni. Þegar Trump stóð upp sagði hann að samkomulag væri nærri en neitaði að fara nánar út í það.

„Ég þarf að fara núna, til að reyna að leysa vandamál í Mið-Austurlöndum,“ sagði hann.

Viðræður milli leiðtoga Hamas og Ísraela hafa farið fram í Egyptalandi undanfarna daga. Þeim er ætlað að binda enda á hernað Ísraela þar og sagði Trump fyrr í kvöld að hann myndi mögulega fara þangað um helgina.

Trump lagði á dögunum fram tillögur að mögulegu friðarsamkomulagi sem samþykktar hafa verið af Ísraelum og nokkrum ríkjum Mið-Austurlanda.

Sjá einnig: Hótar hel­víti á jörð sam­þykki Hamas ekki til­lögurnar

Al Jazeera hefur eftir heimildarmanni sínum í Palestínu að leiðtogar Hamas hafi samþykkt að sleppa öllum gíslum sem eru í þeirra haldi, en ekki líkum sem þeir halda enn. Heimildarmaðurinn segir nokkurn árangur hafa náðst þegar kemur að skiptum á föngum og tryggingum um að Ísraelar hefji stríðið ekki aftur þegar gíslum hefur verið sleppt.

Líbanskur miðill sem kallast Al Mayadeen segir að leiðtogar Hamas hafi samþykkt samkomulag sem hafi verið til umræðu í dag og skrifa eigi undir það í Egyptalandi á morgun. Það hefur ekki verið staðfest enn þegar þetta er skrifað (22:08).

CNN hefur heimildir fyrir því að stutt sé í yfirlýsingu frá Trump.

Frá því Rubio rétti Trump miðann hafa tvær færslur verið birtar á síðu hans á Truth Social, báðar myndbönd. Annað þeirra fjallar í einföldu máli sagt um að Demókratar séu ömurlegir. Hitt er um að ástandið í Chicago sé hræðilegt.

Fréttin verður uppfærð.