For­setinn lýsti yfir þjóð­há­tíð í Botsvana

Botsvana varð þar með fyrsta Afríkuþjóðin til að vinna þessa grein og því um sögulegan sigur að ræða, eins og forsetinn benti á í tilkynningu þar sem hann dásamaði sveitina fyrir sína frammistöðu. Hann lýsti því jafnframt yfir að næsta mánudag yrði þjóðhátíð til að fagna afrekinu, daginn fyrir sjálfan þjóðhátíðardag Botsvana.

Það voru þeir Lee Bhekempilo Eppie, Letsile Tebogo, Bayapo Ndori og Busang Collen Kebinatshipi sem hlupu fyrir hönd Botsvana og tókst að stöðva einokun Bandaríkjamanna í æsispennandi hlaupi.

Botsvana kom í mark á 2:57,76 mínútum eða aðeins 7/100 úr sekúndu á undan Bandaríkjunum og Suður-Afríku, eftir ótrúlegan endasprett Kebinatshipi sem um tíma virtist vera að missa máttinn en náði að sigla fram úr hinum bandaríska Rai Benjamin sem stífnaði upp í lokin.

„Ég mun segja öllum frá því að demtantarnir frá Botsvana séu ekki bara í jarðveginum heldur einnig sem heimsmeistarar okkar í íþróttum,“ sagði Boko.

Þetta voru ekki einu verðlaun Botsvana því Kebinatshipi hafði áður orðið heimsmeistari í 400 metra hlaupi. Alls endaði þjóðin í fimmta sæti yfir flest verðlaun á mótinu í Tókýó, með tvenn gullverðlaun, silfur og brons.

Aðeins Bandaríkin, Kenía, Holland og Kanada gerðu betur. Bandaríkin voru langsigursælust með 16 gullverðlaun, 5 silfur og 5 brons en Kenía í 2. sæti með 7 gullverðlaun, eitt brons og eitt silfur.