Stefán stefnir á opnun fyrir jól: „Þetta verður bullandi stemning“

Á dögunum var skellt í lás á veitingastaðnum Brút, sem rekinn hafði verið í nokkur ár við góðan orðstír í húsinu, og kaffihúsinu Kaffi Ó-le, sem rekið hafði verið ögn skemur en ekki við síðri orðstýr. 

Þar með losnuðu glæsileg pláss fyrir annars vegar veitingastað og hins vegar kaffihús í sögufrægu húsi, þar sem nú er rekið hótel undir merkjum Radisson-keðjunnar alþjóðlegu. Fréttamiðillinn FF7 greindi frá því í dag að Stefán Melsted hyggði á opnun svokallaðs bístrós í húsinu ásamt félögum sínum. Það hafði miðillinn eftir heimildum sínum.

Þaulreyndur í faginu

Stefán var á fundi þegar Vísir sló á þráðinn hjá honum og gat því ekki rakið fyrirætlanir sínar í þaula en staðfesti þó að hann stefndi að því að opna bæði veitingastað og kaffihús auk „skemmtilegs bars“. Hann yrði þó einn í rekstrinum og ekki væri komin lokamynd á það hvers konar staði yrði um að ræða.

„Þetta verður einhver bullandi stemning,“ sagði hann. Hann þekkir vel til stemningarinnar sem fylgir því að reka veitingastaði enda hefur hann staðið að opnun staða á borð við Snaps, Kastrup og Plútó pizza.

Sleppa framkvæmdum til að flýta fyrir opnun

Spurður að því hvenær hann stefni á opnun staðanna segir hann það alfarið undir „embættismönnunum“ komið en veitingamenn hafa kvartað sáran undanfarna mánuði undan hægagangi í leyfisveitingaferlum. 

Þó hafa reglugerðarbreytingar verið gerðar og lagabreytingar boðaðar til þess að flýta megi fyrir veitingu leyfa til reksturs veitingastaða. Stefán segist enn sem komið er ekki hafa rekist á neina veggi að þessu sinni.

Nauðsynlegt sé að opna sem allra fyrst til þess að þjónusta gesti hótelsins og hann sé þegar byrjaður að hjálpa hótelinu að komast yfir hjallann í morgunverðarmálum.

Hann ætli ekki að ráðast í neinar framkvæmdir og reikni því með að ná að opna með pompi og prakt fyrir jól.