Sagði for­eldrana lík­lega hafa dottið í að­draganda andlátsins

Þetta er á meðal þess sem kemur fram í gæsluvarðhaldsúrskurðum sem hafa verið birtir á vef Landsréttar.

Líkt og fréttastofa hefur greint frá er Margrét grunuð um að hafa í aðdraganda andláts föðurins, sem bar að þann 11. apríl síðastliðinn, beitt foreldra sína ofbeldi í tíu klukkustundir.

Hún er jafnframt grunuð um að beita foreldrana margvíslegu ofbeldi mánuðina á undan, en þau höfðu ítrekað leitað á sjúkrahús og til læknis áður en faðir hennar, sem var áttræður, lést. Síðast hafði hann farið á sjúkrahús tveimur dögum áður en hann féll frá.

Ljóst að þarna hafði mikið gengið á

Í úrskurðinum er aðkomu lögreglu á vettvang, heimili þeirra í Súlunesi, lýst. Faðirinn mun hafa verið meðvitundarlaus og móðirin að reyna að aðstoða hann. Dóttir þeirra, Margrét, hafi staðið innan við forstofuna. Endurlífgun hófst á vettvangi, en hún gekk ekki.

Fram kemur að blóðslettur hafi verið víðs vegar um húsið, meðal annars á veggjum, og þótti lögreglu ljóst að þarna hafði eitthvað gengið á.

Sagðist hafa heyrt dynk

Í gæsluvarðhaldsúrskurðum Héraðsdóms Reykjaness, sem Landsréttur hefur staðfest, kemur fram að Margrét hafi í skýrslutökum hjá lögreglu neitað sök.

Miklum áverkum foreldranna er þar lýst, en jafnframt áverkum á handleggjum og bringu Margrétar.

Hún hafi talað um að daginn sem faðirinn lést og hún handtekin hafi hún verið inni í svefnherbergi hjá sér og heyrt dynk. Hún hafi farið fram og séð föður sinn liggjandi á gólfinu. Kvaðst hún halda að hann hefði dottið.

Aðspurð um áverka á móður sinni talaði hún á sama veg. Hún sagði að móðir sín hefði nýlega dottið eða rekið sig í.

Áttu í handalögmálum nokkrum mánuðum fyrr

Þá sagði hún að þann 15. apríl hefði komið til handalögmála á milli einstaklinga. Í úrskurðinum sem birtur hefur verið á netinu hafa upplýsingar um hverjir áttu í þessum meintu upplýsingum verið afmáðar, en þar virðast, miðað við hennar lýsingar, að minnsta kosti foreldrarnir og hún tekist á .

Margrét mun hafa talað um að í þetta skipti hafi þau öll ýtt hvert öðru. Hún kvaðst hafa slegið frá sér til þeirra beggja og höggin lent á andliti þeirra

Vitni lýsa ofbeldishegðun

Skýrslur hafa verið teknar af vitnum sem hafa lýst ofbeldishegðun Margrétar í garð foreldra sinna. Þá liggi fyrir gögn frá fagaðilum þar sem fram kemur að hún hafi beitt þau ofbeldi.

Hún mun hafa lýst því að ofbeldisástand hafi verið á heimilinu síðan hún var barn.

Áverkarnir líklega komið fram á mismunandi tímum

Fram kemur í réttarkrufningu að áverkarnir á líki föðurins bendi sterklega til þess að „annar einstaklingur, eða einstaklingar, hafi veitt honum allflesta áverkana“. Áverkanir hafi verið margvíslegir í eðli. Líklega hafi þeir komið fram á „mismunandi tímum og undir ólíkum hornum“.

Í þessari niðurstöðu krufningarinnar lá dánarorsök föðurins ekki fyrir, en þó segir að áverkarnir séu þess eðlis að þeir hafi getað valdið dauða og að óhikað megi íhuga þann möguleika að um manndráp hafi verið að ræða.