„Lífið er miklu meira en peningar“

Það var DV sem fjallaði fyrst um umsvif Jóns Péturs Zimsens á hlutabréfamarkaði í dag. Þar segir, sem rétt er, að umsvif hans á samfélagsmiðlum hafi ekki vakið minni athygli. Færslur hans um biturð og ráðríki hinna fátæku í garð þeirra „sem eru vel stæðir“ hafa sætt gagnrýni í ljósi þess að hann er erfingi umtalsverðra fjármuna.

Af auðugum ættum

Eins og nafnið gefur til kynna er Jón Pétur af Zimsenættinni sem eru afkomendur Christians Zimsen sem stofnaði Laugarnesapótek og sat í stjórn lyfjafyrirtækisins Pharmaco hf. sem síðar varð Actavis. Zimsensystkynin, Kristinn, Nils, Else og Jón, áttu samanlagða rúma sjö milljarða króna samkvæmt umfjöllun Viðskiptablaðsins frá árinu 2013.

Hann lítur sjálfur á það sem svo að þeir sem minna eiga á milli handanna séu líklega bitrir og tengir þann hóp við kjósendur ríkisstjórnarflokkanna.

„Einhver hefur komið illa fram við þá og þeir eru í vandræðum með sjálfsmynd sína. Þeim finnst þeir ekki metnir að verðleikum og að heimurinn sé ÓSANNGJARN. Að allt sé einhverjum ÖÐRUM að kenna og því nærtækt að kenna þeim um sem hafa það betur,“ skrifaði hann í færslu sem hann birti á samfélagsmiðlum síðastliðinn fimmtudag og vakti mikla athygli.

Lítil eign í Brim

Þegar Jón Pétur sór drengskaparheitin þurfti hann sem aðrir að skrá umsvif sín í viðskiptalífinu í hagsmunaskrá. Samkvæmt því er þar kemur fram á hann 41,1 prósent hlut í Jöká ehf., 55 prósent hlut í Alnitak ehf. og 15 prósent hlut í RZ ehf. Af opinberlega aðgengilegum ársreikningum er Jöká það umsvifamesta en þar er Jón Pétur stærsti eigandi. Meðeigendur hans eru Nils, Óli Björn og Jóhann Tómas Zimsen og er félagið skráð með heimilisfesti heima hjá Jóni Pétri.

Sjá einnig: Kennarar ættu að koma sér úr hlutverki fórnarlamba

Eigið fé Jöká ehf. var samkvæmt síðasta ársreikningi, frá rekstarárinu 2023, samtals rúmar 830 milljónir króna. Hagnaður nam rúmum 217 milljónum króna. Hlutabréf í eigu félagsins námu rúmum hálfum milljarði króna og þar á meðal voru hlutir í Brim, Marel, Hampiðjunni og Iceland Seafood International sem voru árið 2023 virði tæplega 90 milljóna króna. Virði bréfa félagsins í Brim námu í árslok 2023 á þriðja tug milljóna króna. Síðan þá hefur Kvika, sem sér um sjóðsstýringu á hlutabréfum fyrir Jöká ehf., selt bréfin í Brim svo eftir stendur hlutur upp á nokkur hundrað þúsund krónur í fyrirtækinu.

Miðað við hlut félagsins í Kerecis sem hefur síðan verið selt fyrir á annað hundrað milljarða má gera ráð fyrir því að eignasafn Zimsenanna sé talsverðs meira virði í dag.

Auk eignarhluts félagsins í fyrirtækjum í sjávarútvegi fjárfesti Jöká einnig í skuldabréfum árið 2023. Þeirra á meðal voru skuldabréf útgefin af Útgerðarfélagi Reykjavíkur, stærsta eiganda Brims upp á 20 milljónir, og 80 milljóna króna víxill frá Iceland Seafood.

Ástríða fyrir árangri unglinga - ekki peningum

„Því betur sem íslenskum fyrirtækjum gengur því betra fyrir alla sem eiga í þeim og allt samfélagið þar sem skattspor eykst við góðan árangur. Bæði hefur fólk fjárfest beint í þeim og svo eiga lífeyrissjóðir töluvert í þeim eins og öllum fyrirtækjum á markaði,“ segir Jón Pétur í samtali við fréttastofu.

Hann segist hafa tekið þátt í atvinnulífinu í langan tíma og segir flesta eiga að gera það sem hafa til þess fjárráð og þola áhættuna. Jón Pétur segir það raunar koma sér vel að stjórnmálamenn eigi eignarhluta í ofangreindum félögum „þegar stjórnmálamenn reyna að skaða fyrirtæki í almannaeigu.“ Þar á hann væntanlega við veiðigjaldafrumvarp atvinnuvegaráðherra, lengstu þingumræðu frá sameiningu málstofanna þar sem hann var á meðal ræðukónga.

Hann klykkir út með að segja að þrátt fyrir umsvif sín sé atvinnulífið alltaf í öðru sæti hjá sér.

„Ástríðan hefur verið að vinna með unglingum, að þeir nái árangri í lífinu. Ótal vinir mínir hafa ekkert skilið í því að ég hafi helgað mig kennslu í tæp þrjátíu ár þegar ég hafi haft ótal möguleika á að fara annað. Lífið er nefnilega miklu meira en peningar. Það er nefnilega miklu betra að geta hjálpað öðrum að breiða út vængina,“ segir Jón Pétur Zimsen, þingmaður Sjálfstæðisflokksins og erfingi umtalsverðra fjármuna.

Fréttin hefur verið leiðrétt eftir nýjar upplýsingar frá Jóni Pétri um breytingar sem orðið hafa á eign hans í Brim frá því ársreikningi Jöká ehf. fyrir árið 2023 var skilað. Ársreikningurinn er nýjasta opinbera gagnið um stöðu félagsins. Í dag nemur eign Jóns Péturs í Brim nokkur hundrað þúsund krónum. Þá var  fullyrt að Jón Pétur væri erfingi milljarða króna sem er ekki rétt.

• ÁrsreikningurÁRSREIKNINGUR2023
  Sækja skjal