Spán­verjar örugg­lega á­fram þrátt fyrir vítaklúður

Spánn er komið í undanúrslit Evrópumóts kvenna í fótbolta eftir 2-0 sigur á heimakonum í Sviss. Spánverjar brenndu af tveimur vítaspyrnum en það kom ekki að sök.

Fyrir leik var búist við auðveldum sigri Spánar en annað átti eftir að koma á daginn. Heimsmeistararnir fengu kjörið tækifæri til að komast yfir í fyrri hálfleik þegar vítaspyrna var dæmt. Slök spyrna Mariona Caldentey hitti hins vegar ekki markið og staðan því markalaus þegar flautað var til loka fyrri hálfleiks.

Þéttur varnarmúr heimakvenna lenti ekki í teljandi vandræðum framan af síðari hálfleik þó spænska liði hafi einokað boltann. Þegar klukkustund var liðin fór boltinn í stöng og slá eftir hornspyrnu. Inn vildi hins vegar boltinn ekki og staðan enn markalaus.

Það voru komnar 65 mínútur á klukkuna þegar heimsmeistararnir brutu ísinn. Hin 24 ára gamla Athenea del Castillo skoraði þá eftir að hafa komið inn af bekknum nokkrum mínútum fyrr. Aitana Bonmatí á þó heiðurinn að markinu en mögnuð hælsending hennar bjó til færið þegar engin leið virtist í gegnum vörn Sviss.

Fimm mínútum síðar má svo segja að Clàudia Pina hafi gert út um leikinn með fallegu skoti fyrir utan teig í kjölfar þess að Spánn vann boltann við vítateig Sviss. Lia Wälti vildi fá aukaspyrnu í aðdragandanum en fékk ekki ósk sína uppfyllta. Staðan orðin 2-0 og brekkan virkilega brött fyrir heimakonur.

Í blálok leiksins fékk Spánn aftur dæmda vítaspyrnu. Að þessu sinni tók Alexia Putellas spyrnuna en ekki gekk henni betur en Caldentey fyrr í leiknum. Spyrnan fór forgörðum og lokatölur 2-0. Í undanúrslitum fá Spánverjar svo fyrsta alvöru próf mótsins þegar þær mæta annað hvort Frakklandi eða Þýskalandi.