Frönsk kona grunuð um að bana dóttur sinni og eigin­manni

Þetta herma heimildir fréttastofu.

Tveir erlendir ferðamenn fundust látnir á lúxushótelinu Edition í miðborg Reykjavíkur í morgun. Umgangsmikil lögregluaðgerð stóð þar yfir í dag. 

Einn ferðamaður til viðbótar var á vettvangi þegar lögreglu bar að og var hann með alvarlega áverka og fluttur undir læknishendur. Samkvæmt heimildum fréttastofu er um að ræða konu á sextugsaldri sem er grunuð um að hafa banað dóttur sinni og eiginmanni með eggvopni.

Var með alvarlega stunguáverka

Ævar Pálmi Pálmason aðstoðaryfirlögregluþjónn sagðist ekki geta staðfest að málsaðilar tengdust fjölskylduböndum þegar fréttastofa ræddi við hann í dag. Hann segir í samtali við fréttastofu að lögregla ætli að fara fram á gæsluvarðhald yfir ferðamanninum, sem hafi verið með alvarlega stunguáverka þegar viðbragðsaðila bar að garði.

Ævar segir að hinir látnu og hinn grunaði séu allir ferðamenn með franskt ríkisfang á aldursbilinu 20-60 ára.  Óljóst sé hvers eðlis ferð þeirra til Íslands hafi verið en þeir hafi verið hér saman í ferð. Hann vildi ekki tjá sig um áverka á þeim látnu.

Ævar telur að atvikið hafi gerst inni á hótelherbergi en í dag var fjórðu hæð hótelsins lokað meðan lögregluaðgerðin stóð yfir.

Tilkynning um málið barst lögreglu kl. 7.14. Sérsveitarmenn, fjórir sjúkraflutningabílar og dælubíll voru kallaðir út. Þegar fréttastofa leitaði viðbragða frá forsvarsmönnum Edition vísuðu þeir á lögreglu.

Fréttin hefur verið uppfærð.