Til­kynnt um barn með vopn og vímu­efni

Samkvæmt dagbók lögreglu fannst barnið og lagði lögreglan hald á það sem fannst á því. Í tilkynningu segir að málið hafi verið leyst á lögreglustöð með aðkomu barnaverndar.

Í dagbók kemur einnig fram að enginn hafi gist í fangageymslum lögreglunnar í nótt og að frá klukkan 17 í gær til fimm í morgun hafi verið bókuð 71 mál. Fjallað er um einhver þeirra í tilkynningu. Þar kemur til dæmis fram að tilkynnt hafi verið um stuld á bíl í vesturhluta borgarinnar en hann fundist stuttu síðar. Tveir voru handteknir vegna málsins sem er í rannsókn.

Einnig var tilkynnt um minni háttar líkamsárás í miðborg Reykjavíkur, það er einnig í rannsókn. Að vanda var svo töluvert um akstur undir áhrifum áfengis eða vímuefna eða án réttinda.