Kallar eftir virðingu eftir tollahótanir Trump

Í færslu á samfélagsmiðlum sagði Trump að tollaviðræður við Evrópusambandið hefðu ekki borið neinn árangur og því legði hann til að fimmtíu prósent tollum yrði komið á innflutning frá Evrópusambandinu frá og með 1. júní. 

Tillagan var enn einn viðsnúningurinn í tollastefnu Bandaríkjastjórnar en fyrir hafði Bandaríkjastjórn lagt á tíu prósent innflutningstolla á Evrópu, að undanskildu áli og stáli, til 8. júlí til að svigrúm gæfist til viðræðna.

Maros Sefcovic viðskiptaráðherra Evrópusambandsins og Jamieson Greer viðskiptaráðherra Bandaríkjanna áttu símtal um þessar fyrirætlanir í gær. Að símtalinu loknu sagði Sefcovic ESB staðráðið í að landa tollasamningi þar sem komið er til móts við báða aðila. 

„Viðskipti milli Evrópusambandsins og Bandaríkjanna eru óviðjafnanleg og verða að grundvallast á virðingu, ekki hótunum. Við erum viðbúin að gæta eigin hagsmuna,“ hefur breska ríkisútvarpið eftir Sefcovic.

Eftir að hafa birt samfélagsmiðlafærsluna sagði Trump við fréttamenn að hann væri ekki að leitast eftir nýjum samningi, viðræðum væri lokið. Þá bætti hann við að umfangsmikil fjárfesting evrópsks fyrirtækis á bandarísku fyrirtæki gæti verið tilefni til seinkunar á lagningu tollanna. 

Tollahótanir Trump hafa vakið hörð viðbrögð evrópskra ráðamanna. BBC hefur eftir Micheál Martin forsætisráðherra Írlands að viðræður séu eina sjálfbæra leiðin fram á við. Laurent Saint-Martin utanríkisráðherra Frakklands tekur í sama streng. 

Katherina Reiche efnahagsráðherra Þýskalands segir Evrópusambandið verða að gera allt sem í sínu valdi stendur til að landa samningi við Bandaríkin. 

Dick Schoof forsætisráðherra Hollands segir aftur á móti að Bandaríkjastjórn sé með aðgerðunum að beita brögðum sem þekkt eru í tollaviðræðum við Bandaríkin.