Bílarnir dregnir upp úr sjónum

Mennirnir tveir eru starfsmenn Hagtaks, sem er verktaki hjá Faxaflóahöfnum og hefur undanfarið unnið að því að lengja hafnargarðinn í Akraneshöfn. Þeir voru staddir á bryggjunni til að meta skemmdir sem urðu á hafnargarðinum vegna fyrri lægðar sem gekk yfir seint á föstudagskvöld þegar aldan hrifsaði þá til sín. 

Slökkvilið var kallað út upp úr klukkan átta ásamt lögreglu, sjúkraflutningamönnum og björgunarsveitum. Að sögn Jens Heiðars Ragnarssonar, slökkviliðsstjóra á Akranesi voru mennirnir, ekki lengi ofan í sjónum og komu sér af sjálfsdáðum upp úr sjónum með hjálp viðstaddra á höfninni. 

Þeir voru báðir fluttir á Heilbrigðisstofnun Vesturlands til athugunar. Annar þeirra var svo fluttur til Reykjavíkur og liggur þungt haldinn á gjörgæslu Landspítalans meðan hinn er ómeiddur.

Bergþór Jóhannsson, forstjóri Hagtaks, sagði í samtali við fréttastofu fyrr í dag að hugur hans væri hjá aðstandendum mannsins en gat ekki tjáð sig frekar um málið að svo stöddu. Rannsóknarnefd samgönguslysa, Vinnueftirlitið og lögreglan á Vesturlandi rannsaka nú tildrög slyssins.

Kranabíll og fimm kafarar

Bílarni voru staðsettir með baujum og ætluðu kafarar kafa eftir bílunum mánudagskvöld en þurftu að hætta við vegna of mikils vinds og slæms skyggnis. Kafararnir fóru aftur af stað í dag þegar bílarnir tveir voru dregnir á land. 

Kjartan Jakob Hauksson, framkvæmdastjóri hjá Sjótækni og aðgerðarstjóri á vettvangi, sagði aðgerðir í dag ekki hafa getað gengið betur þrátt fyrir vandasamt verk og erfiðar aðstæður fyrir kafara á svæðinu.

„Veðrið er að vinna með okkur en síðustu tvo daga reyndum við þetta því höfnin er lokuð og það er skip að bíða eftir að fá að komast inn. Það hefur gengið vel hjá okkur í dag, það hefur allt gengið upp í rauninni.“

Sjótækni sá um aðgerðina með hjálp frá lögreglunni á Vesturlandi og björgunarsveitarmönnum björgunarfélags Akraness aðstoðaði Sjótækni. Fimm kafarar frá Sjótækni unnu hörðum höndum að verkefninu.

„Björgunarsveitin er með aðstoðarmenn hérna líka, lögreglan og menn frá Faxaflóahöfnum svo það er svolítið af mannskap í þessu. Þetta er vandasamt verk í sjálfu sér. Þó að veðrið sé gott eins og þið sjáið þá sér kafarinn ekki handaskil í sjónum. Það er búið að vera svo mikið brim í sjónum, svo mikið hafrót að það er ekkert skyggni, það sést kannski fimm sentímetrar eða tíu sentímetrar niðri,“ sagði Kjartan.

Þá var Kranabíll frá Borgarverki ehf notaður til að hífa upp bílana og sáu starfsmenn þess um þann hluta aðgerðarinnar.

Uppfært: Upphaflega kom ranglega fram að Landhelgisgæslan hefði komið að aðgerðinni. Það hefur verið leiðrétt.