Jón segir Guð­rúnu eigna sér árangur for­vera sinna og gera lítið úr þeim

Jón skrifar um málið í Facebook-færslu sem birtist um sexleytið í kvöld. Þar bregst hann við yfirlýsingum Guðrúnar í Spursmálum um árangur hennar í dómsmálaráðuneytinu og segist hann nauðbeygður til að skrifa á þeim vettvangi þar sem hún svari ekki póstum hans. 

Tímasetning færslunnar er áhugaverð svo skömmu fyrir landsfund en Jón hefur verið kenndur við Áslaugar-arm flokksins (áður Bjarna-arminn).

„Góður leiðtogi hvetur samverkamenn, styður þá til góðra verka og gefur þeim svigrúm til að njóta þess sem vel er gert. Þannig verður til öflug liðsheild þar sem hver og einn fær að njóta sín. Öflugur leiðtogi eignar sér ekki árangur annarra eða gerir lítið úr þeim sem á undan komu,“ skrifar Jón í færslunni. 

Með færslunni deilir Jón myndbandi af Guðrúnu úr Spursmálum sem hún sjálf hafði birt á Facebook-síðu sinni fyrr í vikunni. Þar fjallar hún árangur sinn í dómsmálaráðuneytinu sem engum öðrum hafði tekist fyrr.

„Ég kom inn í þetta ráðuneyti með það að augnamiði að ná stjórn á þessum málaflokki og hvað gerðist? Á síðasta ári fækkaði umsóknum um vernd á Íslandi um 55 prósent, brottflutningur frá landinu jókst um 70 prósent. Það er árangur að geta keyrt í gegn breytingar á útlendingalögum sem engum öðrum hafi tekist fyrr en að ég geri það,“ segir Guðrún í klippunni. 

Hún bætir svo við að mest um vert sé að hún hafi náð að keyra í gegn breytingar á lögreglulögum sem Björn Bjarnason hafi fyrst lagt fram árið 2007.

„Ekkert er fjarri lagi“

Jón segir að sér þyki miður að skrifa á Facebook um þessi mál en ekki sjá undan því komist að gera athugasemd við málflutning Guðrúnar í klippunni.

„Hún hefur haldið því fram að ekkert hafi gerst í útlendingamálunum fyrr en hún steig inn í dómsmálaráðuneytið. Ekkert er fjarri lagi. Guðrún hefur í engu svarað persónulegum pósti mínum til hennar um þetta mál. Hún væri meiri manneskja með því að leiðrétta þetta með einhverjum hætti sjálf,“ segir hann í færslunni.

Grunnur að árangri í útlendingamálum segir Jón að hafi verið lagður í sameiginlegu átaki þeirra sem voru á undan Guðrúnu í dómsmálaráðuneytinu og þingflokks Sjálfstæðisflokksins. 

„Þetta þekki ég vel eftir að hafa setið í stóli dómsmálaráðherra, þar sem ég talaði afdráttarlaust gegn þeirri stöðu sem þá var uppi í útlendingamálum. Umsóknum fjölgaði í veldisvexti með tilheyrandi áhrifum á íslenskt samfélag, álagi á innviði og kostnaði,“ segir Jón.

Sér hafi verið gerðar upp annarlegar skoðanir

Hann segir að ráðherrar flokksins sem komu á undan honum hafi allir gert ítrekaðar tilraunir til breytinga á útlendingalögum og lagt drög að þeim breytingum sem síðan náðust í gegn.

„Það gustar oft um þá sem fara gegn straumnum og það var lýsandi fyrir tíma minn í ráðuneytinu. Árið 2023 náðum við Sjálfstæðismenn í gegn fyrstu breytingum á útlendingalögum; mál voru afgreidd hraðar, spornað var við misnotkun verndarkerfisins, skerpt á heimildum til skerðingar og niðurfellingar þjónustu til þeirra sem voru hér í ólögmætri dvöl,“ segir í færslunni.

„Við tryggðum framkvæmd ákvarðana um frávísun og brottvísun og aukningu á tímabilinu má að langstærstum hluta rekja til endurmats á stöðu í Venezúela sem við settum í gang seinni hluta árs 2022. Eftir langan tíma samþykkti kærunefnd útlendingamála að landið væri ekki óöruggt land,“ segir einnig.

Allt hafi það verið eðlilegar breytingar á útlendingalögum og segist hann stoltur af þeim. 

„Það þurfti að hafa fyrir því að koma þessu í gegn, mér voru gerðar upp annarlegar skoðanir af stjórnarandstæðingum og reyndar hluta stjórnarliða sem tóku þessum breytingum illa,“ segir Jón í færslunni.

Ævinlega þakklátur fyrir trausta forystu Bjarna 

Þingflokkur Sjálfstæðisflokksins hafi staðið þétt með Jóni í öllum þessum verkefnum öllum, sérstaklega þeir þingmenn flokksins sem voru í þingnefndunum þegar frumvarpið var í meðförum þingsins.

„Fráfarandi formaður okkar Bjarni Benediktsson var eins og klettur í málinu við ríkisstjórnarborðið, stóð þétt við bak ráðherra flokksins í málaflokknum og talaði óhikað fyrir því sem hann vissi að var rétt. Skemmst er að minnast yfirlýsinga hans á tröppum Bessastaða 19. Júní 2023, þar gaf hann skýra línu. Ég er honum ævinlega þakklátur fyrir trausta forystu í þessu máli líkt og öðrum undanfarin ár,“ segir Jón í færslunni.

Loks segir Jón að sé þyki miður að Guðrún Hafsteinsdóttir velji fremur þann kost að slá sig til riddara en að halda til haga því sem rétt er. Hann segist sjá sig nauðbeygðan til að birta færsluna þar Guðrún hafi hunsað persónuleg skilaboð hans til hennar vegna málsins.