Blöskrar 14 prósent verð­hækkun tryggingarfélags

„Þetta ár byrjar eins og öll önnur þ.e.a.s fyrirtæki og sveitarfélög halda uppi viðteknum hætti og varpa hækkunum miskunnarlaust á almenning í upphafi hvers árs!“ skrifaði Vilhjálmur á Facebook síðu sína í gær.

Tilefni pistilsins var verðhækkun hjá tryggingarfélaginu VÍS, sem hækkaði verð sitt um fjórtán prósent um áramótin. Nokkrum dögum áður hafði Vilhjálmur vakið athygli á umtalsverðri hækkun fasteignagjalda á Akranesi, þar sem fasteignagjöld fjölbýlishúsa hækkuðu um allt að sautján prósent um áramótin.

Hækkanir langt umfram hækkun neysluvísitölunnar

Vilhjálmur segir að framangreindar verðhækkanir séu langt umfram hækkun neysluvísitölunnar, sem hafi verið um 4,8 prósent. Ljóst sé að mörg fyrirtæki ætli ekki að taka þátt í þeirri vegferð sem verkalýðshreyfingin hafi verið tilbúin að fara í.

„Þetta framferði fyrirtækja og sveitarfélaga er með öllu óboðlegt enda munum við aldrei ná tökum á verðbólgunni né ná að lækka vexti ef allir ætla ekki að axla sína ábyrgð í þeirri vegferð. Eitt er víst að launafólk og heimili þessa lands munu ekki ein geta axlað þá ábyrgð,“ segir Vilhjálmur.

Fyrir áramót greindi Vilhjálmur frá hækkun fasteignagjalda hjá Akraneskaupstað á nýju ári. Þá sagði hann að fasteignagjöld hjá þeim sem búa í fjölbýlishúsum hefðu hækkað um 17,6 prósent, en hjá þeim sem byggju í raðhúsum hefðu þau hækkað um 11,56 prósent. Hjá þeim sem byggju í einbýli hefðu þau hækkað um 12,06 prósent.

„Það er eins og alltaf að öllum vanda er miskunnarlaust varpað á herðar heimilanna, launafólks og fyrirtækja, en eftir mínum heimildum eru fasteignagjöld á fyrirtæki að hækka um allt að 25%,“ segir hann svo.

Áskorun í sex liðum

Í dag birti hann svo áskorun í sex liðum sem stíluð var til fyrirtækja og stofnana ríkis og sveitarfélaga.

Þar segir hann að launafólk hafi þegar stigið stórt og mikilvægt skref í baráttunni við verðbólguna með því að gera hófstillta langtíma kjarasamninga. Nú sé komið að fyrirtækjum, sveitarfélögum, ríki, fjármálastofnunum, tryggingarfyrirtækjum og orkufyrirtækjum að axla ábyrgð og standa með launafólki og heimilum.

Áskorunin er eftirfarandi:

1. Hættið öllum óþarfa hækkunum á vöruverði, þjónustu, gjaldskrám, tryggingaiðgjöldum og orkuverði. Slíkar hækkanir leggjast þungt á heimilin og grafa undan fjárhagslegu öryggi launafólks.
2. Lækkið vexti og dragið úr okurkjörum í fjármálakerfinu. Fjármálastofnanir verða að hætta að hámarka eigin hagnað á kostnað almennings og skapa svigrúm fyrir heimilin til að standa undir sínum skuldbindingum.
3. Endurskoðið verðlagningu tryggingaiðgjalda. Tryggingarfélög verða að sýna samfélagslega ábyrgð með því að hætta óhóflegum hækkunum sem setja enn frekara álag á heimili landsins.
4. Tryggið sanngjarnt orkuverð. Orkufyrirtæki hafa lykilhlutverki að gegna í að létta undir með heimilum og fyrirtækjum með því að stilla orkuverði í hóf og setja hagsmuni samfélagsins í forgang.
5. Takið ábyrgð á verðstöðugleika. Fyrirtæki, sveitarfélög, fjármálakerfi, tryggingafélög og orkufyrirtæki verða að standa saman með því að stilla af verðlagningu og draga úr álögum sem hafa beinar afleiðingar fyrir fjárhagsstöðu heimila og launafólks.
6. Sýnið raunverulega samfélagslega ábyrgð. Orð um samfélagslega ábyrgð verða að endurspeglast í aðgerðum sem létta byrðar af heimilum og styðja við þau í baráttunni gegn verðbólgu.

Rætt var við Vilhjálm í Reykjavík síðdegis í dag.