Olivia Hussey er látin

Hin bresk-argentínska Hussey lést á föstudag umkringd fjölskyldumeðlimum segir í yfirlýsingu sem birtist á Instagram-síðu hennar. 

Hún hafði farið í tvöfalt brjóstnám vegna brjóstakrabbameins árið 2008 en krabbameinið tók sig upp að nýju árið 2017 og dró hana að lokum til dauða.

„Hvíl í friði nú mín fallega Júlía, ekkert óréttlæti getur skaðað þig nú. Og heimurinn mun muna þína fegurð að innan sem utan að eilífu,“ skrifaði Leonard Whiting, meðleikari hennar í Rómeó og Júlíu, í yfirlýsingu.

Hlaut heimsfrægð fimmtán ára

Hussey fæddist í Buenos Aires í Argentínu árið 1951, dóttir tangódansarans Osvaldo Ribó og lögritarans Joy Hussey. Olivia flutti með móður sinni og bróður til London þegar hún var sjö ára og hóf skömmu síðar fimm ára nám við leiklistarskólann Italia Conti í Woking. 

Hussey byrjaði að leika á sviði og í sjónvarpi sem táningur. Þegar hún var fimmtán ára sá ítalski leikstjórinn Franco Zeffirelli hana á sviði og réði hana í kjölfarið til að leika Júlíu í aðlögun á harmleik Shakespeare. Hún lék þar á móti hinum sextán ára Leonard Whiting í hlutverki Rómeó.

Myndin kom út árið 1968, sló í gegn og var tilnefnd til Óskarsverðlauna sem besta mynd og fyrir besta leikstjóra. Hussey hlaut verðlaun á Golden Globes-verðlaunahátíðinni það árið sem besta nýja stjarnan.

Höfðuðu mál vegna nektarsenu

Árið 2023 höfðuðu Hussey og Whiting, þá komin á áttræðisaldur, mál gegn Paramount Pictures vegna kyn­ferðis­legr­ar mis­notk­un­ar, kyn­ferðis­legr­ar áreitni og svika. Þau sögðu Zeffirelli, sem lést árið 2019, hafa hvatt þau til að leika í nekt­ar­atriði þrátt fyr­ir að hafa áður lofað þeim að þau þyrftu þess ekki. 

Zeffirelli hafði sagt þeim að þau myndu vera í ljósbrúnum nærfötum en þegar atriðið var tekið upp sagði hann að líkamar þeirra yrðu farðaðir þannig að engin nekt myndi sjást. Svo var ekki raunin, í myndinni sást í rasskinnar Whitings og brjóst Hussey.

Þau sóttust eftir skaðabótum að andvirði hálfs milljarðs Bandaríkjadala vegna þjáningarinnar sem þau þoldu og gróða myndarinnar. Málinu var á endanum vísað frá á þeim forsendum að atriðið væri ekki nægilega „kynferðislega djarft“.

Áhrifamikil heimsókn til spákonu

Eftir Rómeó og Júlíu átti Hussey farsælan áratugalangan feril í Hollywood. Eftir að hafa farið til spákonu sem sagði Hussey að hún myndi leika í vinsælli kanadískri mynd tók hún hlutverki í jólahryllingsmyndinni Black Christmas árið 1974.

Myndin fékk sæmilega dóma en reyndist afar áhrifamikil sem ein fyrsta slægjumyndin (e. slasher-film) og varð síðar költ-klassík. Karakter Hussey í myndinni, Jess Bradford, varð sömuleiðis ein fyrsta „síðasta stúlkan“ (e. final-girl) sinnar gerðar. 

Eftir að hafa leikið í hryllingsmyndinni Psycho IV: The Beginning og þáttunum IT hlaut Hussey nafnbótina öskurdrottning (e. scream queen).

Hussey lék auk þess Maríu, móður Jesús, í sjónvarpsseríu eftir Zeffirelli um Jesús árið 1977, Rosalie Otterbourne í Death on the Nile og svo tók hún að sér ýmis talsetningarhlutverk í kringum aldamótin.

Fjallað var um Hussey í Morgunblaðinu árið 1985 í greininni „Hvað varð um Oliviu Hussey“ en þar kom fram að leikkonan hefði þjáðst af víðáttubrjálæði. Þar kom einnig fram að hún hefði gift sig tvívegis, annars vegar leikaranum Dean Paul Martin og hins vegar poppsöngvaranum Akira Fuse, og eignast tvö börn. Eftir það skildi hún og gifti sig í þriðja sinn, í þetta skiptið popparanum David Glen Eisley og eignaðist með honum dótturina Indiu Eisley.