„Gamla góða“ Cocoa Puffsið aftur í verslanir

Þetta kemur fram í tilkynningu frá Nathan og Olsen. Þar segir að sögn framleiðandans vestanhafs, General Mills, hafi öllum hindrunum nú verið rutt úr vegi og munu íslenskir neytendur því aftur geta gætt sér á hinu eina sanna súkkulaði-morgunkorni strax í byrjun desember. 

Heilbrigðiseftirlit Reykjavíkur og Heilbrigðiseftirlit Garðabæjar, Hafnarfjarðr, Kópavogs, Mosfellsbæjar og Seltjarnarness settu sölustöðvun á morgunkornið 22. september árið 2022. Ástæðan var sögð óleyfileg litarefni, E160b, sem framleiðandinn hafði bætt við og stóðst ekki Evrópulöggjöf. 

Haft er eftir Davíð Hansson Wíum, markaðsstjóra Nathan og Olsen, að hann fagni tíðindunum enda fái hann reglulega fyrirspurnir, bæði frá verslunum og unnendum Cocoa Puffs, um hvenær pakkarnir góðkunnu gætu mögulega birst aftur í búðarhillum. 

„Við gerðum líka tilraun með innflutning á Cocoa Puffs pökkum sem voru framleiddir í Evrópu eftir annarri uppskrift og það gekk ekki nægilega vel enda bragðið og áferðin öðruvísi en fólk átti að venjast. Íslendingar þekkja sitt Cocoa Puffs og þess vegna hlökkum við til að færa þeim þetta ekta gamla góða aftur sem allra fyrst“. 

Óhætt er að fullyrða að margir Íslendingar muni rifja upp gamlar góðar stundir með Cocoa Puffs um jólin - þótt eflaust muni margir freistast til að kíkja í pakkann eitthvað fyrr