Sló átta ára dóttur sína eftir tap

Valina Fetiu, sem er frá Kósovó, komst í úrslit í sínum flokki á mótinu en varð þar að játa sigraða gegn hinni serbnesku Ninu Savic sem þar með hlaut gullverðlaun.

Strax eftir bardagann kom Fetiu til þjálfara síns, Valjmir Fetiu, sem jafnframt er pabbi hennar. Hann reif harkalega í hjálm Valinu og losaði hann, áður en Valina kraup niður grátandi.

Pabbi hennar skipaði henni að standa á fætur og sló hana svo kinnhest.

Þetta sá dómari viðureignarinnar sem virtist reyna að skipa pabbanum að hafa hemil á sér, og skoðaði einnig nafnspjald hans. Pabbinn hefur nú verið dæmdur í sex mánaða bann frá allri keppni í taekwondo, af evrópska taekwondo-sambandinu.

Eftir að hafa orðið sér til ævarandi skammar með því að brjóta gegn eigin barni, átta ára gömlu, reyndi pabbinn að réttlæta hegðun sína í viðtali við miðilinn Klan Kosova í heimalandi sínu.

„Hún er dóttir mín og enginn elskar hana meira en ég. Á þessu augnabliki var hún reið og ekki með sjálfri sér, eftir að hafa tapað gegn serbneska keppandanum, og hún lá í jörðinni og gat ekki sætt sig við að hafa tapað. Ég vildi bara róa hana niður og láta hana vita að þó að hún hefði tapað þá hefði hún náð öðru sæti og að hún fengi fleiri tækifæri,“ sagði pabbinn, Valjmir Fetiu, og vildi meina að serbneskir miðlar væru með áróður gegn sér, þrátt fyrir að myndband af obeldi hans segi sína sögu.

„Fjölmiðlar í Kósovó féllu fyrir áróðri Serba sem reyndu að gefa þessu atviki aðra merkingu. Ég endurtek, ég er pabbi hennar. Eiginkona mín og móðir Valinu var þarna nokkra metra í burtu. Enginn Serbi eða Bosníu maður gæti elska dóttur sína meira en við gerum. Ég var búinn að vinna með Valinu í tólf mánuði fyrir þessa keppni og ég mun halda áfram alla ævina,“ sagði pabbinn.