Verk­fallið hafi mikil á­hrif á fáar fjöl­skyldur og lítil á­hrif á sam­félagið

Þá segir Jóhanna Dröfn aðgerðirnar einnig ábyrgðarlausar og geta haft slæmt áhrif til frambúðar.

„Í núverandi ástandi þar sem geðheilsa barna og ungmenna fer sífellt versnandi og stjórnmálamenn keppast um að ræða mikilvægi þess að hlúa að börnunum eru þessar aðgerðir eins og blaut tuska í andlitið. Þessi tími í lífi barnanna er afar mikilvægur hvað varðar þroska og almenna heilsu og það verður að taka ábyrgð á því,“ segir Jóhanna Dröfn og að það geti haft alvarlega afleiðingar fyrir börn sem er sífellt „verið að koma fyrir í pössun“.

Jóhanna Dröfn starfar sem læknir á geðsviði spítalans og segir verkfallið einnig hafa áhrif á það.

„Þessar aðgerðir hafa svo aðrar og einnig alvarlegar afleiðingar fyrir hópa sem mega ekki við því, til að mynda mína sjúklinga á geðsviði Landspítala sem fá ekki að hitta lækninn sinn þar sem undirrituð getur ekki mætt til vinnu vegna verkfallsins,“ segir Jóhanna Dröfn.

Ekki samræmi hjá kennurum og læknum

Þá segir Jóhanna Dröfn skrítið að verkfallsaðgerðir kennara séu löglegar, en ekki lækna. Verkfalli lækna var frestað og tilkynnt að boðað yrði til nýs verkfalls en ríkið taldi verkfallsboðun lækna ólöglega. Verkfallsboðun kennara fór fyrir Félagsdóm og var dæmd lögleg. Læknar ákváðu að fara ekki þá leið því þeir töldu það geta frestað verkfalli fram í desember.

„Nú er ekki ætlunin að fara blanda verkfallsaðgerðum kennara og lækna saman en mig langar að benda á að ríkið telur boðaðar verkfallsaðgerðir lækna ólöglegar, m.a. vegna þess að verkfallsboðunin tæki ekki til allra lækna hjá þeim vinnuveitenda sem verkfall beinist gegn. Hvernig getur verkfall kennara með þeim hætti sem nú er beitt staðist lög samanborið við ofangreint?“ spyr hún í grein sinni.

Þá vill hún fá betri svör við því hvers vegna fjórir leikskólar voru valdir í þessar verkfallsaðgerðir og hvernig þeir voru valdir. Einnig vill hún vita hvers vegna verkfallið er ótímabundið á þessum leikskólum en ekki í þeim grunn- eða framhaldsskólum þar sem boðað hefur verið til verkfalls.

„Ég tel eðlilegt að þessum spurningum verði svarað hið snarasta. Að lokum vil ég hvetja samningsaðila til þess að taka ábyrgð, setja fram raunhæfar og skýrar kröfur og semja sem allra fyrst. Mig langar líka til þess að hvetja stjórnmálafólk til þess að vera fólk orða sinna, hlúa að heilsu barna okkar og stíga hér inn enda er það deginum ljósara að þessi staða gengur ekki til lengdar.“

Hvorki Haraldur Freyr Gíslason formaður Félags leikskólakennara né Kennarasamband Íslands hafa, samkvæmt heimildum fréttastofu, svarað fyrirspurnum foreldra á Drafnarsteini og á leikskólanum á Seltjarnarnesi um það hvernig leikskólarnir voru valdir og af hverju verkfallið er ótímabundið í leikskólum.  

Ekki búið að boða til nýs fundar

Ekki er búið að boða til nýs fundar í kjaradeilu Kennarasambandsins við ríki og sveitarfélög. Formaður Kennarasambandsins sagði í gær síðasta fund hafa gengið vel en það virðist enn vera langt í samninga. Deiluaðilar funduðu í fyrradag.

Verkföll í níu skólum hófust fyrir helgi. Kennarar við Menntaskólann í Reykjavík bætast við hópinn eftir tvær vikur og kennarar Árbæjarskóla, Garðaskóla og Heiðarskóla eftir þrjár vikur. Engin önnur atkvæðagreiðsla um verkföll er í gangi sem stendur.